Drotské tevrede met 70 minute
2010-08-09 13:10
Witbank - Die Vrystaat-Cheetahs is miskien Smith-loos, maar beur vreesloos vorentoe in die Curriebeker-rugbyreeks nadat hulle die Pumas Saterdagmiddag hier sonder te veel moeite met 45-30 geklop het.
Hul gereelde kaptein, Juan Smith, se afwesigheid het die Cheetahs al in die verlede gekniehalter, maar Hendro Scholtz het hulle tot ’n oortuigende oorwinning aangevoer wat hulle op pad na die reeks se halfeindronde hou.
Om sonder Smith te speel is niks nuuts vir die Vrystaters nie, en met sy waarskynlike betrokkenheid in die res van die Drienasies-reeks gaan dit weer van die Cheetahs vereis word.
“Juan is ’n goeie speler, maar ek verskil met die media wat sê ons kan nie sonder hom speel nie,” het die Cheetahs se afrigter, Naka Drotské, gesê.
Op grond van Saterdag se vertoning is hy reg. ’n Drie deur Jongi Nokwe kort voor rustyd en nog drie drieë ná die rustyd was genoeg vir die Cheetahs om die Pumas te pootjie.
Hul balbehoud was veral goed en hulle het die Pumas laat betaal wanneer die tuisspan die bal onnodig verloor of weggegee het.
Die beweeglikheid van die voorrymanne Coenie Oosthuizen, WP Nel, Adriaan Strauss en CJ van der Linde is een van die Cheetahs se heel grootste wapens en herinner aan Os du Randt, Ollie le Roux en Willie Meyer op hul beste.
“Behalwe die laaste 10 minute, dink ek ons was goed,” het Drotské gesê.
“Ons was met 45-16 voor en het toe net onnodige foute begaan.”
Sy span sal vandeesweek met selfvertroue voorberei vir hul kragmeting met die Leeus op Coca-Colapark.
Slegs die slot Barend Pieterse moet ná die Pumas-wedstryd ’n ligte kuitbesering afskud.
Die Pumas se goeie spel in die laaste 10 minute was byna genoeg om ’n bonuspunt vir vier drieë te kry, maar hulle moes met drie tevrede wees.
Jimmy Stonehouse, die Pumas se afrigter, erken dat onnodige foute weer sy span se ondergang was, selfs al het hy met ander afdelings knap meegeding.
“Die Cheetahs hou besit baie goed. Maar ons moet net ons foute begin beperk en dit is jammer, want ons kry dit in die oefening reg.”
Die Pumas moet Vrydag in Kimberley teen Griekwas speel en sal dit sonder die plettervatter Siviwe Magaba moet doen.
Dié senter het vroeg in die wedstryd ernstige harsingskudding opgedoen.
Puntemakers:
Vrystaat-Cheetahs 45 (24): Drieë: Coenie Oosthuizen, Hendro Scholtz, Jongi Nokwe, Hennie Daniller, Robert Ebersohn, Meyer Bosman. Doelskoppe: Louis Strydom (4), Sias Ebersohn (2). Strafdoel: Strydom.
Pumas 30 (16): Drieë: Shaun Venter, Jacques Coetzee, Carl Bezuidenhout. Doelskoppe: Ricardo Croy (2), Elgar Watts. Strafdoele: Croy (3).