Div spoel mond uit oor WP
2010-08-13 08:57
Johannesburg – ‘Dit is jammer as afrigters wat hul land kon dien nié toegelaat word om dit te doen nie. Wat dit erger maak, is dat daar dalk nou na buitelanders gekyk moet word om wel daardie taak te verrig waarvan betrokke plaaslike afrigters weerhou word.”
Só het die Bok-afrigter, Peter de Villiers, gister gereageer op die nuus dat die Stormers en die Westelike Provinsie se verdedigingsafrigter, Jacques Nienaber, nie deur dié rugbyunie aan die Springbokke geleen mag word nie.
Nienaber het na Kaapstad teruggekeer nadat hy vandeesweek hier by die Bokke se oefenkamp was om te help.
De Villiers het ook laat blyk dat Nienaber nie weer om hulp gevra sal word terwyl hy die Springbokke afrig nie.
“Dit is jammer dat so iets moes gebeur. Die betrokke afrigter het ’n kans gehad om sy kennis ten bate van die land te benut, maar word nou nie toegelaat om dit te doen nie.
“Dit was sy groot kans om op die hoogste vlak ’n bydrae te kan lewer en dit is nou verbeur.
“Boonop beteken dit dalk dat ek nou iemand in die buiteland moet gaan soek om die werk te doen wat ’n Suid-Afrikaner kon doen,” het die Bok-breier gekla.
Nienaber is nader getrek nadat die Bokke op die oorsese deel van die Drienasies-toer erg gesukkel het om teenstanders uit hul doelgebied te hou en tien drieë in die drie toetse afgestaan het.
De Villiers het erken hy het hulp nodig. “Ons sal altyd van kundiges gebruik maak. Ek dink die WP en die Blou Bulle se verdedigingsafrigters is van wêreldgehalte en Gary Gold (Bok-voorspelerbreier) is nie ver agter hulle nie. Ons het nie goed verdedig oorsee nie, maar dit is net nodig om klein verstellings te maak.”
Die breier het erken dat die span tussen twee spelpatrone vasgevang was. “In die verlede het die grootste groep uit die Bulls en Sharks bestaan. Hul spelpatroon en manier van speel het nie soveel verskil nie.
“Vanjaar is dit (die span) tussen die Bulls en Stormers en dit verskil wesenlik. Die spelers het nie vinnig genoeg aangepas nie. Ons het ’n goeie uitspoelsessie gehad,” het De Villiers gesê.
Op ’n voorstel dat die probleem opgelos kan word deur minder Stormers-spelers te kies, het die breier hartlik geskater.
Op ’n meer ernstige noot het hy die All Blacks, wat ook die Aussies twee keer geklop het ná agtereenvolgende seges oor die Springbokke, só opgesom.
“Baie goed.”
De Villiers gaan Dinsdag sy span bekend maak vir die toets Saterdag teen die All Blacks in die FNB-stadion.
Danie Rossouw het ’n harde stamp teen die bobeen gekry in ’n klipharde oefening by die Hoërskool Hyde Park waar die spelers behoorlik onder mekaar ingeklim het.
Baie aandag is aan die afbreekpunte geskenk.