Div hoop Andries keer sterker terug
2010-06-08 06:47
Kaapstad – Andries Bekker sal die volle steun van sy afrigter, Peter de Villiers, hê wanneer hy aanstaande week midde-in ’n persoonlike krisis na die Springbok-groep terugkeer.
De Villiers wil hê sy spelers moet as rolmodelle in die samelewing dien, maar verlede week se onthullings dat Bekker ’n buite-egtelike verhouding het, gaan nie sy Bok-loopbaan in die gedrang bring nie.
Inteendeel, De Villiers hoop die puik slot van die Stormers keer as ’n sterker mens terug.
“Die Here bring slegs dinge oor jou pad om jou sterker te maak. Daarmee sê ek nie dis die Here wat hom die verkeerde ding laat doen het nie, maar hy kan as ’n sterker mens terugkeer,” het De Villiers gister gesê.
“Dis wat Suid-Afrika nodig het, en ons trap nie op mense wanneer hulle lê nie.
“Ek sal veel eerder vir Andries al die tyd wil gee wat hy nodig het om homself uit te sorteer en saam met sy familie deur die ding te kom.
“Jou familie gaan ná rugby nog steeds daar wees. Familie is vir my só belangrik en as ek vir hom en sy familie die geleentheid kan gun om sterker te word, is dit vir my positief.”
Bekker sukkel nog met ’n besering aan sy lae rug en is nie gister in die groep vir Saterdag se wedstryd teen Frankryk op Nuweland ingesluit nie.
“Hy is veronderstel om volgende week terug te wees en ek het nie met hom gepraat toe die ding (nuus oor die verhouding) gebreek het nie,” het De Villiers gesê.
“Dis ’n slegte situasie vir enigiemand om in te wees. Ons maak soms die verkeerde besluite in die lewe, maar dit maak nie van ons slegte mense nie. Dis net die verkeerde besluit.”
De Villiers het ook in die gesprek oor Bekker uit eie ervaring na die onsmaaklike seksvideo-storie in 2008 verwys. Daar was nooit bewyse van enige onwelvoeglike optrede deur die Bok-breier nie en hy het die bewerings ten sterkste ontken.
“Daar was nooit bewyse nie, maar dit het ’n slegte impak op my familie gehad. My dogter kon nie universiteit toe gaan nie en haar punte het daaronder gely. My ma het op die ouderdom van 84 byna ’n hartaanval gehad.”
Bekker sal op sy vermoë as ’n rugbyspeler deur sy breier beoordeel word.
“Andries het soos Flip van der Merwe (wat gister die eerste keer by ’n Bok-groep betrek is) en Juan de Jongh ’n puik Super14 gehad en ons beloon spelers daarvoor,” het De Villiers gesê.
“Ek kies nie spelers om sentimentele redes nie. Ek kies spelers omdat hulle ’n verskil kan maak.”
Die Westelike Provinsie-rugbyunie het bekend gemaak daar is nog kaartjies beskikbaar vir Saterdag se toets tussen Suid-Afrika en Frankryk op Nuweland.
Die kaartjiekantoor buite Nuweland is vandag van 09:00 oop, terwyl kaartjies ook by Computicket of Shoprite-Checkers aangeskaf kan word.
Die pryse wissel van R100 tot R400.
Bly op hoogte van al die jongste sportnuus deur Nuus24Sport op Twitter te volg.