Div besoek Bok-flank by huis
2010-05-25 08:00
Bloemfontein - Die Springbok-flank Juan Smith sal waarskynlik eers weer in Augustus vir die Bokke uitdraf.
Smith het hom weens die onlangse afsterwe van sy pa, Giel, aan sy Bok-verpligtinge onttrek en hoop om vir die tuiswedstryde in die Drienasies-reeks beskikbaar te wees.
Die kaptein van die Cheetahs, wat ook ’n liesbesering het, sal intussen vir die Vrystaat in die Curriebeker-reeks uitdraf.
Smith is Saterdag – soos verwag – nie deur die Springbok-afrigter, Peter de Villiers, vir die toets teen Wallis gekies nie. De Villiers het gesê Smith is weens persoonlike redes nie oorweeg nie.
Dié flank het aan Sport24 gesê dat die breier hom gister hier by sy huis besoek en voorgestel het dat hy eers alles uitwerk.
Smith sal sy familie bystaan en sy pa, wat sowat ’n maand en ’n half gelede aan komplikasies weens slenkdalkoors oorlede is, se dood verwerk.
Hy sê dit was een van die swaarste besluite van sy loopbaan. “My ma gaan deur ’n moeilike tyd en sy is baie emosioneel. Ek was die afgelope tyd baie besig, aangesien ek ná my pa se dood in die Super14-reeks vir die Cheetahs gespeel het. Daarom het sy dood nog nie werklik ingesink nie. Die werklikheid tref ’n mens nou eers en ek wil boonop nie vir die Bokke speel as ek nie 100% reg is nie,” sê hy.
Verder sou Smith gister ’n skandering vir ’n ligte liesbesering ondergaan en kan hy langs die kantlyn wees as hy geopereer moet word.
Hoewel hy nie presies kan sê wanneer hy beskikbaar gaan wees nie, hoop Smith om by sy Bok-spanmaats aan te sluit as hulle van Australasië af terugkeer.
“Ons sal ná die oorsese been van die Drienasies kyk hoe sake staan.”
Die Bokke se eerste tuiswedstryd is op 21 Augustus in Johannesburg teen Nieu-Seeland.
Volgens Smith het De Villiers ook ingestem dat hy vir die Vrystaat kan speel om fiks te bly. Die Vrystaat begin sy Curriebeker-aanslag op 10 Julie hier teen die Westelike Provinsie.
Smith sê hy kry baie ondersteuning van die Bok-afrigter.
“Ek waardeer dit om ’n speler onder Peter te wees. Sy verhouding met elke speler is ongelooflik en dis beslis wat hom so ’n goeie afrigter maak. Dis die eerste keer dat ek in ’n Bok-span is waar die afrigter soveel omgee vir sy spelers. Hy het die moeite gedoen om na my toe te vlieg en gesê hy is 100% agter my.”
Bly op hoogte van al die jongste sportnuus deur Nuus24Sport op Twitter te volg.
- Sport24