Dít is hoekom Matfield nie sal speel

2012-05-24 07:30

Kaapstad – Die Springbok-afrigter, Heyneke Meyer, het erken dat 'n reël van die Internasionale Rugbyraad, wat verband hou met uitgetrede spelers, hom verhoed om Victor Matfield vir die opkomende toetsreeks teen Engeland te kies.

Ingevolge dié reël mag 'n uitgetrede speler, wat sy terugkeer na die spel aankondig, ses maande ná die aangekondiging geen internasionale rugbywedstryde speel nie.

Dié reël is in plek om te verhoed dat spelers wat positief getoets is vir verbode middels skielik uittree om tyd te "koop" om die middels uit hul stelsel te kry en daarna weer skielik hul terugkeer na die spel aankondig.

Meyer het erken dat dit die hoofrede is hoekom hy nie die uitgetrede Matfield kan oproep vir die toetsreeks teen Engeland nie, berig Beeld.

Die eerste toetswedstryd teen Engeland begin op 9 Junie in Durban, gevolg deur wedstryd in Johannesburg (16 Junie) en Port Elizabeth (23 Junie).

– Sport24

– Volg Nuus24Sport op Twitter