Dis lekker op Loftus
2010-07-10 06:54
Die Burger
Pretoria. - Daar is darem geen plek op aarde soos jou eie huis nie.
Vir die Blou Bulle se rugbyspan was dit gisteraand ’n geval van home, sweet home toe hulle die Curriebeker op ’n seëvierende noot begin verdedig het deur die Pumas hier op Loftus Versfeld met 38-15 te klop.
Hulle het hul tuiskoms ná omswerwinge in Soweto ’n heuglike geleentheid gemaak en ses drieë ingeryg.
Vir die Witbankers was dit ’n wrede kennismaking met rugby op hierdie vlak.
Sommer binne die eerste kwartier het hulle drie keer agter hul eie doelpale gestaan en die Bulle het ná slegs 22 minute hul bonuspunt vir vier drieë gehad.
Die Ligbloues se agterlyn was vroeg lus vir hardloop en vier van die vyf drieë wat voor rustyd gedruk is, het via die driekwarte gekom.
John Mametsa het die wenspan se rekening geopen ná ’n beweging wat op die middellyn begin het en waarin Jaco van der Westhuyzen ’n astrante aangee op nonchalante wyse in Mametsa se hande gegee het om oor te draf.
Die Bulle het spel oorheers in die eerste halfuur en ’n hele paar langafstand-drieë gedruk.
Tot hul krediet het die Pumas in die laaste tien minute tot verhaal gekom en sterk aangeval.
Kort voor die spanne kante geruil het, is die besoekers beloon met ’n puik individuele drie deur die skrumskakel, Tian Meyer.
Die besoekers het enduit geveg en die Bulle veral in die tweede helfte ’n moeilike tyd besorg.
Die Bulle het rustyd met 31-10 voorgeloop – en met die vyf ligapunte klaar in die sakkie, het dinge in die tweede helfte sleg uitgerafel.
’n Groot deel van die net meer as 6 000 toeskouers wat die Bulle weer op Loftus kom verwelkom het, moes seker gewonder het hoekom hulle nou eintlik die moeite gedoen het, want dit was soms ’n erge getjommel.
Die Bulle moes 29 minute lank spook in die tweede helfte om die telbord weer aan die rol te kry toe Deon Stegmann deur die agttal oorgedryf is ná ’n lynstaan.
Al vertel die telbord die verhaal van ’n oortuigende sege, was die wyse waarop die wenspan in die tweede helfte soos ’n afgeblaasde ballon grondwaarts gedaal het iets wat Frans Ludeke (breier) tot kommer sal stem.
Puntemakers:
Blou Bulle 38: Drieë: John Mametsa (2), Stephan Dippenaar, Stefan Watermeyer, Dean Greyling, Deon Stegmann. Doelskoppe: Jacques-Louis Potgieter (3), Francois Brummer.
Pumas 15: Drieë: Tian Meyer, Alistair Kettledas. Doelskop: Ricardo Croy. Strafdoel: Croy.
Die Blou Bulle se o.19-span het gistermiddag amok gemaak toe hy die Griffons se jongelinge in ’n voorwedstryd met 71-5 oorrompel het.
Die Bulletjies was met rustyd reeds met 35-5 voor.
Die losskakel, Pieter van der Walt, was een van sy span se groot uitblinkers.
Hy het met ’n drie en agt doelskoppe 21 punte aangeteken.
- Die Burger
