Dis hoe rugby-speelveld lyk
2010-09-23 09:51
Kaapstad - Bryan Habana en JP Pietersen se gemaksones in die Springbok-rugbyspan is daarmee heen met die nuwe generasie vleuels van kleur wat vanjaar in Suid-Afrikaanse rugby na vore getree het.
Onder die grootste uitblinkers is die kragtige Haaie-vleuel Lwazi Mvovo, die Griekwas-drieëvraat Bjorn Basson en die vlugvoetige Streeptrui Gio Aplon.
Basson is die voorste driedrukker in die Curriebeker-rugbyreeks met 14 drieë, met Mvovo tweede (9) en Aplon vierde met 6 drieë.
Al drie is sterk aanspraakmakers om aan die einde van die jaar saam met die Springbokke na Brittanje en Ierland te toer.
Aplon, wat vanjaar sy Springbok-buiging gemaak het, was verlede week die speler van die wedstryd in die WP se wegholsege van 62-10 oor die Pumas.
Hy kan ook heelagter speel en dit kan ook die posisie wees wat die Springbok-keurders vir hom in gedagte het op toer.
Voeg die WP se senter-sensasie Juan de Jongh by dié prentjie en dis onmiddellik duidelik dat die Bok-keurders geen probleem sal hê nie om op verdienste ’n span te kies wat waarskynlik Butana Komphela én Kallie Kriel tevrede sal hou.
Breyton Paulse, vleuel-ikoon van Springbok- en WP rugby, glo Mvovo, Basson en Aplon bied almal vir Suid-Afrika goeie keuses vir die toer.
“Nie een van die drie sal die Bok-span in die steek laat nie.
Dis dié soort spelers wat die toeskouers opgewonde maak wanneer hulle die bal kry en dis die kenmerk van ’n goeie vleuel,” sê Paulse.
“Bjorn kan ’n drie uit niks druk en daar is min spelers wat daardie vaardigheid het.
“Mvovo speel in ’n Haaie-span wat oorloop van selfvertroue en is vir my die vonds van die seisoen onder die vleuels.
Dis sy tweede jaar van Curriebeker-rugby en hy het baie mense verras.
“Dis goed om te sien dat jong spelers hul kanse aangryp. Wat jy ook wil sien, is dat hulle op kritieke tye uitblink.
Mvovo se vertoning teen die Blou Bulle is daarvan ’n voorbeeld.”
Paulse se verbeelding is nie net deur die bruin en swart vleuels in die Curriebeker-reeks aangegryp nie.
Hy het ook groot lof vir die jong Blou Bul Gerhard van den Heever.
“Gerhard het my baie beïndruk en is self ’n man vir die toekoms. Ek sou hom ook vir die toer oorweeg.
“Hy het vaart en op die nat velde in die Noordelike Halfrond help dit ook om ’n fisieke speler soos hy te hê,” sê Paulse.
Habana en Pietersen het nog baie om vir Suid-Afrikaanse rugby te bied en hul kondisioneringsprogramme is daarop gemik om seker te maak dat hulle op hul beste is vir aanstaande jaar se Wêreldbeker-toernooi.
“Hulle het lank bo gebly en is baie ervare. Ek glo hulle gaan sterk terugkom, maar moet bestuur word voor die Wêreldbeker-toernooi,” sê Paulse.
“Dis baie belangrik om nie in ’n gemaksone te verval nie. Die druk kom ook nou van jonger spelers af.”
Paulse glo Suid-Afrika kan aan ’n nuwe agterste driehoek bou op die toer terwyl die seniors rus.
Hy glo ook Aplon kan sterk as heelagter oorweeg word.
“Heelagter is eintlik sy gunsteling posisie en hy het die tonge met sy teenaanvalle los gehad wanneer hy daar gespeel het,” sê hy.
“Australië en Nieu-Seeland is juis sterk met hul teenaanvalle en dis ’n aspek van die spel waar Suid-Afrika ’n bietjie agter geraak het.”
Bly op hoogte van al die jongste sportnuus deur Nuus24Sport op Twitter te volg.
- Sport24