Dié Leeus ‘brul weer soos Kitch se span’
2011-09-06 10:09
Johannesburg – Die laaste Goue Leeus-rugbykaptein wat die Curriebeker omhoog gehou het, Hannes Strydom, dink nie net die Leeus is weer op die pad na beker-glorie nie.
Hy wil sommer op daardie dag self daar wees om dié beker aan die volgende wenkaptein van die Leeus te oorhandig.
“Ek dink Leeus-ondersteuners kan al begin opgewonde raak. Dit is heerlik om hul selfvertroue gade te slaan en te sien hoe John Mitchell (afrigter) in die spelers glo,” het Strydom, wat kaptein van die Curriebeker-wenspan in 1999 was, gesê.
“Dit voel weer soos in (’n voormalige afrigter) Kitch Christie se tyd. Soos toe, het die spelers nou diep gaan grawe, gesien hulle is nie op standaard nie en hard gewerk om ’n krag te word.”
Baie water moet nog in die see loop, maar met die Leeus wat steeds bo-aan die Curriebeker-puntelys is en wedstryde teen Griekwas (tuis) en die Luiperds (weg) wat wag, is die Leeus se pad na die uitkloprondes in hul eie hande.
“Om die Curriebeker te wen, is presies wat dié unie nodig het. Hulle is weer ’n wenspan en kyk maar net hoeveel ondersteuners is nou by hul wedstryde,” het Strydom gesê.
“Die unie het boude op sitplekke nodig gehad. Ek hou ook van die manier waarop hulle speel – met passie.
“Mense kan maar sê dat die ander unies sonder hul beste Springbokke is, maar soveel van daardie Bokke tree uit of gaan oorsee speel ná die Wêreldbeker-toernooi.
“Die spelers wat nou in die Curriebeker-reeks speel, is die toekoms van Suid-Afrikaanse rugby,” het Strydom gesê.
Hy glo die vertroue wat Mitchell in sy spelers plaas, het ’n groot verandering in die Leeus-psige meegebring.
“Die spelers het ’n afrigter nodig gehad wat in hulle glo. Hy (Mitchell) is nie ’n ou wat jou van die veld haal nadat jy een ding swak doen en jou nooit weer kies nie.
“Sy afrigtingsmetodes werk, maar dit is daardie selfvertroue wat hy in die span tuisbring wat uitstaan.
“Nou is die spelers nie bang om kanse te waag nie. Hulle weet as dit werk, werk dit, en as dit nie werk nie, sal jy nie sommer uitgegooi word nie,” het die gewese Springbok-slot gesê.
Terwyl Mitchell en sy spelers weier om verder te dink as hul volgende kragmeting, sien Strydom ’n groot toekoms vir dié Leeus-span.
“As hulle aan die einde van die jaar die Curriebeker wen, soek ek ’n uitnodiging om as die laaste Leeus-wenkaptein die trofee aan die volgende wenkaptein te oorhandig,” het hy gelag.
Vir die jongste sportnuus volg Nuus24Sport op Twitter.
– Sport24