Die Leeu-brekers!
2011-10-31 08:01
Johannesburg – Vir al die maer jare wat Goue Leeus soos Doppies la Grange en Cobus Grobbelaar alles wat hulle het in Leeus-rugby ingeploeg het, maar steeds gely het.
Daarvoor vergoed die suikersoet smaak van Curriebeker-vonkelwyn.
’n Donker dekade van rugby in Johannesburg is Saterdagaand finaal beëindig met die Leeus se pragsege van 42-16 oor die Haaie.
“Hierdie was my lewensdroom in rugby. Ek weet ek kan namens my en Baywatch (Grobbelaar) praat as ek sê dit was my droom om my naam op daardie trofee te kry,” sê La Grange.
“’n Ou offer so baie op en ek dink nie hulle gaan my nou sommer op 29 jaar as ’n Springbok kies nie. Dit was my doel dié.”
La Grange was uitstekend as buitesenter in die eindstryd en sy breekslag tussen Stefan Terblanche en Conrad Hoffmann deur het tot Michael Killian se drie in die eerste helfte gelei.
Dit was die eerste van drie drieë waarmee die Leeus die Haaie gesink het.
“Nou maak die verlede nie meer saak nie,” sê La Grange.
“Ons het so gegroei as ’n groep broers. Ons het saamgeoefen, -gesweet en -gehuil. En vanaand het ons die vrugte gepluk.
“Dit is al wat saak maak.”
Terwyl ’n hele nuwe generasie jong Leeus net so puik in die eindstrydoorwinning was, was die oomblik veral roerend vir die ou staatmakers.
La Grange en Grobbelaar speel al sedert 2003 vir die Leeus, Wikus van Heerden het sy Leeus-buiging in 2001 gemaak en dan is daar Franco van der Merwe en JC Janse van Rensburg wat vyf seisoene lank al alles gee.
“Vir my persoonlik het ek gevoel ons gaan wen toe Elton (Jantjies) en Jaco (Taute) hul eerste skoppe oorsit,” het La Grange vertel. “Ek het ’n gevoel gekry ons gaan dit vanaand maak.”
Om op dié tydstip van sy Leeus-loopbaan deel van só ’n algehele gedaanteverwisseling van ’n ploeterspan tot ’n brekerspan te wees, is iets waaroor La Grange juig. “Kyk maar na Elton en die verskil in hom tussen verlede jaar en nou. Die kalmte waarmee hy speel.
“En Jaco Taute. Hierdie ouens is toekomstige legendes van Transvaal-rugby, toekomstige Springbokke.”
Volgens La Grange is die Leeus-spelers doelbewus oor die afgelope 16 maande ook as gehalte-mense ontwikkel en nie net as rugbyspelers nie.
Die 30-jarige Grobbelaar het ook gesê hy het oor die jare heen saam met baie spelers van gehalte by die Leeus gespeel, maar nooit saam met ’n wenspan nie.
Vir die jongste sportnuus volg Nuus24Sport op Twitter.
– Sport24