'Deans het Wallabies verwoes' – Campese

2012-11-15 13:21

Kaapstad – Die Wallaby-legende David Campese sê die afrigter Robbie Deans is verantwoordelik vir Australië se treurige rekord en moet in die pad gesteek word.

Australië het verlede jaar die Drienasies gewen en derde geëindig by die Wêreldbeker-toernooi in Nieu-Seeland, maar sedert Deans in 2008 as hoofafrigter aangestel is, sukkel hulle teen die All Blacks en is die span verneder in nederlae teen Samoa en Skotland.

Die Wallabies het laas Saterdag ook teen Frankryk vasgeval en dit is dié nederlaag wat Campese warm onder die kraag het.

"Deans het Australiese rugby vernietig en ek wil hê hy moet gaan," het Campese gesê.

"Ons het tans 'n span wat nie kan vang nie en nie 'n bal kan aangee nie. Wallaby-spanne in die verlede was nooit so nie."

"Enigiemand wat Australiese rugby ken weet waarvoor dit bekend is – teenaanvalle, kreatiewe spel... waarheen het dit alles gegaan? Ons kan nie eers 'n bal ordentlik aangee nie."

"Ek weet net nie hoekom ons 'n buitelander moes aanstel nie. En ons het twee Wêreldbekers met ons eie afrigters gewen. Kyk 'n bietjie hoe word Matt Giteau behandel... hy sit in Toulon met 92 toetse op sy kerfstok en klaar met toetsrugby. En dit net omdat die afrigter nie van hom hou nie."

Australië se pad raak net steiler. Die span draf Saterdag teen Engeland op Twickenham uit en ten spyte van Campese se pleidooie sal Deans waarskynlik as afrigter aanbly vir volgende jaar se toetsreeks teen die Britse en Ierse Leeus.

Lees verder.

Vir die jongste sportnuus volg Nuus24Sport op Twitter.

– Sport24