Danny Care waarsku Springbokke

2012-11-20 09:49

Kaapstad – Die skrumskakel Danny Carry het gewaarsku dat die Springbokke Saterdag op Twickenham teen 'n gevaarlike Engelse span te staan gaan kom.

Die Rose het laas naweek met 20-14 teen 'n verswakte Australiese span verloor en Care sê die span sal karakter wys teen die Bokke.

Suid-Afrika het die toetsreeks teen Engeland in Junie met 2-0 gewen nadat die laaste wedstryd in Port Elizabeth 'n gelykopuitslag (14-14) was.

Care het egter gesê dat die span baie geleer het uit die toer en glo die tyd is reg om wraak te neem teen 'n span wat hy as "voorspelbaar" beskryf.

"Die Springbokke het massiewe voorspelers en groot agterspelers wat hard gaan hardloop en goed sal verdedig. Ons sal dus gereed moet wees vir 'n fisieke aanslag," het die 25-jarige Dinsdag aan die express.co.uk-webtuiste gesê.

"Maar die toetse in Junie het ons die vertroue gegee dat ons hulle kan klop. Hoewel ons nie kon voorspel hoe Australië gaan speel nie, is jy met Suid-Afrika 'n bietjie meer seker oor wat hulle gaan doen."

England het die Springbokke laas in 2006 geklop met Suid-Afrika wat nege agtereenvolgende kragmetings voor die gelykopuitslag in Port Elizabeth gewen het.

Afskoptyd Saterdag is om 16:30.

Vir die jongste sportnuus volg Nuus24Sport op Twitter.

– Sport24