D-dag vir Doppies-hulle in stampvol stadion
2011-10-27 07:00
Johannesburg – Gideon la Grange is reeds sedert 2003 deur dik en dun as ’t ware die hartklop van die Goue Leeus se agterlyn.
Maar Saterdag gaan dié senter, wat as Doppies bekend staan, die eerste keer in sy loopbaan voor ’n volgepakte paviljoen op Coca-Colapark speel.
Die laaste kaartjies vir die eindstryd teen die Haaie was teen gister verkoop en die Leeus-rugbyspan gaan die eerste keer sedert sy vorige Curriebeker-eindstryd hier, in 2002 teen die Blou Bulle, in ’n volgepakte stadion speel.
La Grange, die Leeus se onderkaptein, gaan sy senter-vennootskap met Alwyn Hollenbach voortsit in ’n span wat geen veranderings toon van die een wat die Westelike Provinsie in die halfeindstryd geklop het nie.
“Ek hét daardie dag (in 2002) gespeel, maar as lid van die Leeus se o.21-span. Ons was ook in die eindstryd.
“Bykomende speeltyd was nodig in ons wedstryd, dus het ons ook so ’n bietjie van (die atmosfeer van) die groot skare gevoel.
“Ek sien uit. As ek dink hoe dit is wanneer ons voor 35 000 mense speel, sal ons seker oorfone nodig hê om Saterdag (voor sowat 65 000 toeskouers) op die veld bevele te roep,” het hy geskerts.
La Grange sê dit is danksy die werk wat die Leeus al verlede jaar in die Curriebeker-reeks begin doen het, dat hulle Saterdag in die eindstryd speel.
“Daar was baie bloed, sweet en trane. Maar ek dink ons almal sien uit. Ons wil dit doen vir al die ondersteuners wat ons oor die jare bly steun het en wil iets aan hulle teruggee,” het die 29-jarige La Grange gesê.
Vanjaar was opnuut ’n aanpassing vir La Grange, aangesien hy van binne- na buitesenter moes skuif omdat Hollenbach so voortreflik as binnesenter vertoon het toe La Grange met ’n besering buite aksie was.
“Ek sal flank of stut ook speel as die span dít vereis. Ek moes wel ’n bietjie leer oor buitesenter. Soos ons gesien het, is Alwyn se verdediging verwoestend en daarmee bring hy ook goeie selfvertroue vir Elton (Jantjies, losskakel) in daardie verdedigingskanaal.”
As die skrumskakel, Michael Bondesio, sou seerkry, sal die Leeus ook op La Grange steun om in dié posisie oor te neem.
Wat die Leeus se agttal betref, is die Springbok CJ van der Linde, wat sy Leeus-buiging in die halfeindstryd gemaak het, vir die eindstryd behou.
Die span is:
Jaco Taute, Deon van Rensburg, Doppies la Grange, Alwyn Hollenbach, Michael Killian, Elton Jantjies, Michael Bondesio, Josh Strauss (k), Michael Rhodes, Derick Minnie, Franco van der Merwe, Wikus van Heerden, Patric Cilliers, Bandise Maku, CJ van der Linde.
Plaasvervangers: Martin Bezuidenhout,Jacobie Adriaanse/JC Janse van Rensburg, Warren Whiteley, Cobus Grobbelaar, Butch James, Dylan des Fountain, James Kamana.
– Sport24
– Bly op hoogte van al die jongste sportnuus deur Nuus24Sport op Twitter te volg