Cooper, ARU begrawe strydbyl

2012-12-07 08:15

Sydney – Die omstrede rugbyspeler Quade Cooper en die Australiese Rugbyunie (ARU) het Vrydag uiteindelik die strydbyl begrawe ná Cooper 'n nuwe tweejaar-kontrak onderteken het om sy land te verteenwoordig.

Cooper het vroeër 'n ander kontrak van die hand gewys ná 'n stormagtige paar maande waarin hy die "giftige" atmosfeer in Australiese rugby gekritiseer het.

Die ARU het aangekondig dat Cooper, wat al 38 keer vir sy land uitgedraf het, 'n kontrak onderteken het wat hom tot 2014 tot die span verbind.

"Quade kan nou daarna uitsien om volgende jaar terug op die veld te wees en om te speel vir die Reds, en kan ook sy merk maak om weer gekies te word vir die Qantas Wallabies-groep," het Matt Carroll, waarnemende uitvoerende hoof van die ARU, gesê.

Die 24-jarige het vroeër vanjaar 'n kontrak van drie jaar met die Reds gesluit, maar dié kontrak sou net van krag wees as hy 'n ARU-kontrak het. Sy oorspronklike ARU-kontrak sou in Desember verval.

– Vir die jongste sportnuus volg Nuus24Sport op Twitter.

- AFP