Chaos toe WP-spelers geld uitdeel
2012-10-31 18:00
Fotogalery - WP se oorwinningsparade
klik op klein foto bo om groter prentjie te sien
Kaapstad – Spelers van die Westelike Provinsie het 'n chaos veroorsaak toe hulle tydens die span se Curriebeker-oorwinningsparade geld na aanhangers in Khayelitsha gegooi het.
Ná 'n wendroogte van 11 jaar het die Streeptruie die Haaie laas Saterdag met 25-18 geklop en Dinsdag met die trofee deur Kaapstad se strate paradeer.
Klik hier vir foto's van die oorwinningsparade in Kaapstad.
Toe die optog in Khayelitsha aankom is die span deur duisende aanhangers verwelkom.
Sommige spelers het byna 'n vertrapping veroorsaak toe hulle geld, wat R50 note insluit, na die ondersteuners gegooi het.
Geen beserings is aangemeld nie.
Die Westelike Provinsie se rugbyunie het in 'n verklaring, wat Woensdag uitgereik is, gesê sommige van die mense in die straat het te kenne gegee dat hulle honger is en die spelers vir geld gevra.
"Dit was dalk 'n bietjie naïef van die spelers wat in die voorval betrokke was, maar die bedoeling was goed. Daar was sekerlik geen negatiewe bedoelings daarmee nie. As dit op enige ander manier geïnterpreteer is vra ons om verskoning," het Theo Wakefield, WP-president, in die verklaring gesê.
Vir die jongste sportnuus volg Nuus24Sport op Twitter.
– Sport24
