Butch het CB-honger ná Bokke in WB gly
2011-10-14 12:04
Johannesburg – Butch James sê hy lê nog elke nag wakker sedert die Springbokke hul Wêreldbeker-kwarteindstryd met 9-11 teen Australië in Wellington verloor het.
James was een van die plaasvervangers in die wedstryd en moes hulpeloos toekyk hoe sy spanmaats die kragmeting ondanks hul oorweldigende oorheersing verloor.
“Ek was waarskynlik nog nooit so verpletter ná ’n wedstryd nie. Die naaste gevoel wat ek daaraan gehad het, was in 2007 se Super14-eindstryd,” het James gesê met verwysing na die 2007-riller toe hy as lid van die Sharks se span weens ’n Bryan Habana-wendrie in die doodsnikke teen die Bulls verloor het.
“Ek slaap nie lekker nie en word elke uur wakker en dink aan dinge wat vir ons reg kon verloop het,” het James oor sy nuutste nagmerrie gesê.
Dié 32-jarige losskakel se min speelkans vir die Bokke in die toernooi was ook vir hom frustrerend. ’n Ligte heupbesering het hom meer speelkans ontneem.
“Ek dink ons wedstryd teen Australië was ons beste in die toernooi, maar ons het nie ons kanse gebruik nie.
“Ons het alles gedoen wat ons kon, behalwe om die punte te kry. En nou word ek snags wakker en wonder hoe op aarde ons dit reggekry het,” het hy gesê.
Terug in Suid-Afrika is James vandeesweek weer deel van ’n Goue Leeus-span wat sy beste kans op ’n Curriebeker-titel in jare het.
James is as ’n plaasvervanger vir die Leeus se wedstryd môre in Durban teen die Haaie gekies.
Hoewel hy tot die afgelope naweek nog aan die Webb Ellis-beker, eerder as die Curriebeker, gedink het, sê hy daar is genoeg rede vir hom om nou Curriebeker-honger te wees.
“Ek het nog nooit ’n Curriebeker gewen nie, al was ek al in baie eindstryde. Daarom het ek baie dryfkrag en hopelik kan ek deel daarvan wees.
“Die ouens (Leeus) speel goed, dus sal dit moeilik vir my wees om in die beginspan te kom. Maar ek is honger om te speel, want sedert die Super Rugbyreeks het ek hoogstens sowat 100 minute se rugby gespeel.
“Vir eers is ek tussen die plaasvervangers, ’n rol wat ek in die laaste tyd goed vertolk het,” het hy met ’n glimlag gesê.
Burton Francis draf môre as die Leeus se losskakel teen die Haaie uit, met Elton Jantjies wat ’n blaaskans gegun word.
Jantjies sal langs James op die plaasvervangersbank wees en indien Jantjies speelkans kry, is die kans goed dat James iewers in die wedstryd op binnesenter teen sy voormalige spanmaats losgelaat sal word.
– Vir die jongste sportnuus volg Nuus24Sport op Twitter.
- Die Burger