Butch: 'Ek soek die nr.10-trui'
2011-11-21 12:16
Johannesburg – Die veteraan-losskakel Butch James glo hy het nog genoeg brandstof in sy tenk om Elton Jantjies vir die Goue Leeus se nr. 10-trui uit te daag.
Die 32-jarige Springbok sê hy is deeglik bewus dat dit 'n uiters moeilike taak sal wees om bo Jantjies, wat vanjaar vir die Curriebeker-kampioene uitgeblink het, gekies te word.
"Hy (Jantjies) speel tans ongelooflike rugby en dit gaan baie moeilik wees om 'n plek in die span te kry, so ek sal dalk in die flank-posisie moet uitdraf vir speelkans," het James geskerts in 'n onderhoud met rugby365.com.
"Ek gaan die swak plekke in die span identifiseer en dan vra om in daardie posisies te speel – hopelik is dit nie in die voorry nie," het hy bygevoeg.
"Elton is tans een van die beste losskakels in die land so ek sal bitter hard moet oefen om die nr.10-trui van sy rug te kry."
James het bygevoeg dat met die Curriebeker-titel agter hul naam, die Rooibontes hul Super Rugby-veldtog met hernieude vertroue sal aanpak.
Lees die volledige artikel hier.
Vir die jongste sportnuus volg Nuus24Sport op Twitter.
– Rugby365.com