Burger uit vir eerste Stormers stryd
2010-01-21 16:05
Kaapstad – Schalk Burger, die kaptein van die Stormers, sal Saterdag se openingswedstryd in die driehoekige byeenkoms teen Western Force op Nuweland misloop.
Die flank het verlede week ‘n bobeenspierbesering tydens ‘n oefensessie opgedoen en kon nie vandeesweek aan al sy span se oefensessies deelneem nie.
“Schalk is baie teleurgesteld dat hy nie kan speel nie, siende dat hy ook kaptein is en gretig was om sy span vir die eerste wedstryd van die seisoen op die veld te lei, het die Stormers se afrigter, Allister Coetzee, gesê.
“Ons het besluit om te hou by ons beleid dat ‘n speler wat nie aan die meerderheid van die span se oefensessies in een week kan deelneem nie, nie vir ‘n wedstryd oorweeg sal word nie,” het Coetzee gesê.
Coetzee het gesê Burger se besering is nie ernstig nie maar dat dit beter is om versigtig te wees.
Die slot Andries Bekker sal in Burger se plek as kaptein uitdraf terwyl Pieter Myburgh die no. 6 trui sal dra.
- Sport24