Bulls se nuwe Super-vere
2011-12-14 09:30
Pretoria. – Eers was daar die nuwe hoof van rugby, tóé ’n nuwe kaptein en nou kan die Bulls eindelik hul nuwe truie aan die wêreld wys.
Soos met die nuwe rugbyhoof, Heyneke Meyer, en die nuwe kaptein, Pierre Spies, is daar kenmerkende en gerusstellende kleure in die nuwe trui van die vervaardiger Puma, wat gister sy kontrak van vyf jaar met die Bulls van stapel laat loop het.
Dit is moontlik gemaak ná ’n hofgeding tussen die Bulls se beroepsarm, die Blou Bulle Maatskappy (Edms.) Bpk. en Gilbert, wat jare lank die verkose klere- en toerustingverskaffer by Loftus Versfeld was.
Nadat die Bulls hul kontrak met Gilbert wou opsê oor “gebrekkige dienslewering en ander probleme” en ’n nuwe kontrak met Puma sluit, is Gilbert hof toe.
Dié sage het gister deur ’n arbiter beëindig toe dié ten gunste van die BBM beslis het.
Die Bulls kon dus hul nuwe toerustings uit die plastieksakke haal en dis nie meer nodig om in truie met toegeplakte logo’s te oefen nie.
Die stoere Bulls-ondersteuner se reaksie sal beslis interessant wees as hulle die “weg-trui” sien.
Dié trui is pienk met pers en blou weerligstrale.
Die Bulls sal sekerlik ’n sug van verligting slaak dat dié sage eindelik afgehandel is.
Hulle kon nie in die afgelope Curriebeker-seisoen met enige van Gilbert of Puma se truie speel nie en die spelers was genoodsaak om die logo’s van eersgenoemde se oefentruie met pleisters toe te plak.
Twee halfblad-advertensies wat Maandag en Dinsdag in Beeld geplaas is met groot foto’s van Spies en Francois Hougaard, waarmee hulle ondersteuners van die span vra om seisoenkaartjies vir 2012 aan te skaf, was opvallend sonder enige kentekens.
Barend van Graan, die uitvoerende hoof van die BBM, het Dinsdag gesê die maatskappy is verheug om ná maande se regsprobleme uiteindelik die borgskap met Puma aan te kondig.
– Sport24
– Bly op hoogte van al die jongste sportnuus deur Nuus24Sport op Twitter te volg