Bulle wil Haaie voor sagmaak
2010-09-02 10:46
Pretoria - ’n Spiertier-plaasvervangersbank en skoppende keuses in die agterlyn.
Dít is hoe die Blou Bulle se Frans Ludeke sy rugbyspan gekies het vir Saterdag se watertand-Curriebekerstryd teen die Natalse Haaie.
Ludeke het vier stutte gekies vir die stryd, ’n duidelike aanduiding dat die Bulle voorlangs die pap dik wil aanmaak.
Hy het dit nie ontken met die bekendmaking van sy span nie.
“Dit is beslis waar die grootste oorlog gaan wees en die meeste gevegte sal woed. Ons het baie diepte op stut en glo ons kan dit tot ons voordeel gebruik,” het Ludeke sy keuse van Frik Kirsten en Jaco Engels op die bank verduidelik.
Met Dean Greyling skitterend op stryk en Werner Kruger stilweg besig om hom as een van die ysters in die reeks te vestig, is Ludeke se optimisme in dié verband verstaanbaar, hoewel ’n enkelbesering aan Kruger sy kaarte effens deurmekaar kan krap.
Die vaskop het Maandagmiddag bly lê ná ’n koppestampsessie en Ludeke sal môre eers besluit of sy enkelbesering genoegsaam herstel het.
Indien nie, sal Kirsten opskuif en Rossouw de Klerk, wat laas in die halfeindstryd van die Curriebeker in 2009 vir die Blou Bulle gespeel het, uit die o.21-span nader geroep word.
“Ons wil goeie geleenthede vir onsself skep. Daarom wil ons seker maak dat ons in die tweede helfte met vars bene steeds die spel kan dikteer,” het Ludeke verduidelik.
Ludeke het agterlangs die wenkbroue laat lig deur die veelsydige Jaco van der Westhuyzen op vleuel te kies, voor spelers soos John Mametsa en Hayden Groepes.
Dit dui op ’n taktiese manier van speel, het Ludeke erken.
“Eerder dit as spelpeil, ja. Jaco sal ook ons tweede losskakel wees en gee ons ander keuses op die bank. Hy het in die Super14 goeie dinge op die vleuel gedoen en ek glo hy sal ons nie teleurstel nie,” het Ludeke gesê.
“Sy taktiese vermoëns en skopvoet help ook baie.”
Mametsa is egter ’n ware strydros wat al 74 keer vir die Bulle in die Curriebeker uitgedraf en 31 drieë gedruk het, waarvan twee in sy laaste verskyning teen Griekwas twee weke gelede.
Die breier het altesame vier skuiwe in die beginspan gemaak, met Gerrit-Jan van Velze wat weer terug is ná sy beenbesering, die vernaamste.
Hy speel agtsteman en Dewald Potgieter skuif flank toe in die plek van CJ Stander, wat as plaasvervanger sal speel. Slegs Groepes en Francois Brummer is heeltemal weggelaat uit die groep wat in Nelspuit uitgedraf het, met laasgenoemde wat senter vir die o.21-span sal speel.
Jacques-Louis Potgieter en Ruan Snyman is die skakelpaar van die span wat deur vir die 24ste keer deur Derick Kuün aangevoer sal word.
Die Blou Bulle se span (met getal wedstryde) is:
Zane Kirchner (24), Gerhard van den Heever (24), Jaco Pretorius (19), Wynand Olivier (44), Jaco van der Westhuyzen (31), Jacques-Louis Potgieter (20), Ruan Snyman (9), Gerrit-Jan van Velze (10), Dewald Potgieter (35), Derick Kuün (64, k), Fudge Mabeta (21), Juandré Kruger (15), Werner Kruger (51), Bandise Maku (28), Dean Greyling (13). PLAASVERVANGERS: Henry Bantjes (0), Frik Kirsten (9), Jaco Engels (53), Wilhelm Steenkamp (37), CJ Stander (8), Dustin Jinka (2), Stefan Watermeyer (16).
Bly op hoogte van al die jongste sportnuus deur Nuus24Sport op Twitter te volg.
- Sport24