Bulle soek Stormers se Nienaber
2012-08-07 15:42
Pretoria – Die Blou Bulle wil die voormalige Springbok- en huidige Stormers-verdedigingsafrigter Jacques Nienaber in hulle kamp hê.
Die Pretorianers het glo ‘n reuse aanbod aan Nienaber gemaak om by hulle aan te sluit vanaf 2013, het SuperSport.com Dinsdag berig.
Nienaber, wat een van die beste verdedigingsafrigters in die wêreld is, het nog nie sy kontrak met die Westelike Provinsie en die Stormers hernu nie. Sy kontrak verstreik einde Oktober.
Nienaber is glo gretig om nader aan sy pa te wees wat onlangs tydnes ‘n inbraak in Potchefstroom ernstig beseer is.
Die Blou Bulle Maatskappy het reeds ‘n formele aanbod vir Nienaber gestuur, maar hy het egter gevra of hy eers ná die Super-rugbyreeks sy besluit kan maak.
Rassie Erasmus, SA Rugby se direkteur van afrigting, is egter gretig om Nienaber by die Springbokke op ‘n konsultasie-basis te kry.
Die aanbod kan glo beteken dat Nienaber die helfte van sy tyd by die Stormers sal wees en die ander helfte by die Springbokke.
Die Blou Bulle Maatskappy se uitvoerende hoof, Barend van Graan, wou egter nie kommentaar lewer toe hy gevra was oor die aanbod vir Nienaber nie.
– Volg Nuus24Sport op Twitter
- SuperSport Zone
