Bulle se Liefling terug op Loftus

2012-11-08 09:07

Kaapstad – Die voormalige Springbok-losskakel Derick Hougaard is straks eersdaags terug op Loftus Versfeld waar hy as skopafrigter die Blou Bulle se junior spanne sal bystaan, het Sport24 Donderdag berig.

Met 'n haksening-besering wat sy speelloopbaan bedreig het Sport24 betroubaar verneem dat Hougaard vanaf aanstaande jaar as skop-konsultant vir die Ligbloues sal werk.

Die 29-jarige het vanaf 2002 tot 2007 vir die Bulle gespeel voor hy na Engeland verhuis het waar hy vir die klubspanne Leicester en Saracens uitgedraf het.

Hy het egter, weens sy besering, in 2010 laas rugby gespeel.

Hougaard het die Springbokke in agt toetse tussen 2003 en 2007 verteenwoordig.

Vir die jongste sportnuus volg Nuus24Sport op Twitter.

– Sport24