Bulle se Bokke almal reg vir aksie
2012-10-08 18:02
Pretoria – Die Blou Bulle se afrigter, Pine Pienaar, het heelwat om oor te glimlag ná al sy terugkerende Springbokke fiks verklaar is.
Dit beteken dat Zane Kirchner, Francois Hougaard, Mornè Steyn, Arno Botha, Jacques Potgieter, Juandrè Kruger en Flip van der Merwe beskikbaar sal wees vir die naweek se wedstryd teen die Goue Leeus.
Die Blou Bulle moet die wedstryd wen om die promosie/relegasie-wedstryd aan die einde van die seisoen te vermy en kan selfs nog vir die halfeindronde kwalifiseer as ander wedstryde gunstige uitslae het.
Kirchner (heup) en Potgieter (maagspier) het nie Maandag geoefen nie, maar sal Dinsdag weer saam met hul spanmaats kan oefen, het die spandokter, Org Strauss, bevestig.
Louis Fouchè, Dewald Potgieter, Bjorn Basson en Franco Mostert het ook Maandag langs die kantlyn gesit, maar sal Dinsdag weer kan oefen.
Pienaar sal Woensdag sy span vir die Jukskei-derby aankondig.
– Sport24
Vir die jongste sportnuus volg Nuus24Sport op Twitter
