Bulle moet Coenie-hulle dophou
2011-09-10 09:17
Bloemfontein - Die Blou Bulle kan hulle vandag hier in hul Curriebeker-rugbykragmeting vir ’n behoorlike grondstryd staal, maar sal ’n fout maak as hulle slegs die Vrystaters se lostrio wil oppas.
Die Cheetahs se gevaarlikste wapen by die afbreekpunte hang nie aan die kant van ’n skrum om eerste by die volgende losskrum uit te kom nie.
Nee, die Vrystaat-stut Coenie Oosthuizen sal eers sorg dat sy span in die skrums saampraat, voordat hy á la die Springbok-flank Heinrich Brüssow balle op die grond gaps.
Volgens Naka Drotské, die Vrystaat-afrigter, is Oosthuizen koning op die grond.
“Coenie is ongelooflik op die grond. As ’n ou gaan kyk na die balle wat ons span in die Curriebeker gesteel het, is hy waarskynlik ons beste balsteler.”
Die Bulle is verlede naweek deur die Haaie in Pretoria op die grond getroef en sal hul storie moet ken.
Daarteenoor kon Drotské vandeesweek kus en keur oor wie sy losvoorspelers moet wees.
Ashley Johnson keer van ’n skouerbesering terug en Drotské het besluit om Philip van der Walt en Lappies Labuschagné, wat teen die Luiperds begin het, as flanke te behou.
“Lappies het die seisoen ingekom en is die soort speler wat veroorsaak het dat ons vir hom moes plek maak,” het Drotské gesê.
“Lappies bied vir ons ’n ekstra lynstaanopsie en veral as baldraer gee hy ons baie momentum. Ek het geen twyfel dat hy dit as ’n nr. 6-flank kan maak nie.”
Die Ligbloues is onder druk en nog ’n nederlaag kan hul hoop op ’n halfeindstryd-plek nog ’n goeie opstopper gee.
Daarom sal hul lostrio, CJ Stander, Dewald Potgieter en Warwick Tecklenburg, nie kan slaplê nie.
Die spanne is
Vrystaat: Hennie Daniller, Riaan Smit, Robert Ebersohn, Philip Snyman, Cameron Jacobs, Johan Goosen, Pieter van Zyl, Ashley Johnson, Philip van der Walt, Lappies Labuschagné, Izak van der Westhuizen, Francois Uys, Coenie Oosthuizen, Adriaan Strauss (k), Marcel van der Merwe. PLAASVERVANGERS: Hercu Liebenberg, Trevor Nyakane, Wilhelm Steenkamp, Boom Prinsloo, Tewis de Bruyn, Sias Ebersohn, Philip Burger.
Blou Bulle: Zane Kirchner, Akona Ndungane, Wynand Olivier, Francois Venter, Bjorn Basson, Louis Fouché, Jano Vermaak, CJ Stander, Dewald Potgieter, Warwick Tecklenburg, Juandré Kruger, Flip van der Merwe, Werner Kruger, Gary Botha (k), Dean Greyling. PLAASVERVANGERS: Willie Wepener, Rossouw de Klerk, Gerrit-Jan van Velze, Arno Botha, Dustin Jinka, Francois Brummer, Jurgen Visser.
Skeidsregter: Marius Jonker
Curriebeker op tv
Vandag
15:00: Haaie t. Pumas (SS 1 en M-Net).
17:05: Cheetahs t. Blou Bulle (SS 1, SHD en M-Net).
21:15: WP t. Luiperds (SS 6)*.
* nie regstreeks.
– Vir die jongste sportnuus volg Nuus24Sport op Twitter