Branco galop weer
2011-11-10 09:57
Kaapstad. – Die Blitsbok Branco du Preez was Woensdag hier pure perd toe die nasionale sewesrubyspan teen die Ikeys in ’n oefenwedstryd gespeel het.
En as daardie proeflopie min anders as Du Preez se fiksheid en gehalte bewys het, kry die Bokke nogtans predikaat.
Die Internasionale Rugbyraad (IRR) se Sewes-wêreldreeks begin oor twee weke aan die Australiese Goue Kus.
Die Blitsbok-toergroep van 14 spelers daarvoor word Vrydag in Stellenbosch aangekondig, maar weens ’n wangbeenbesering sal Cecil Afrika die eerste toernooi misloop.
Hy is Suid-Afrika en die IRR se sewesspeler van die jaar en om ’n waardige plaasvervanger vir hom te kry, het tot verlede week onwaarskynlik gelyk.
Du Preez, ewe behendig as sweeper en losskakel, het sy enkel in Mei in Skotland beseer.
Nadat die voormalige WP-voorryman Johan van Wyk hom op ’n intensiewe rehabilitasieprogram gehad het, het dié blitsbuks vroeër vandeesweek weer kontak gevat en die Ikeys Woensdag laat bontstaan.
“Hy is darem maar in ’n ander klas, nê,” het die Blitsbok-breier, Paul Treu, aan Sport24 gesê.
Benewens sy gebruiklike take het Du Preez Woensdag moeiteloos van iedere voet afgetrap en nie gelyk soos iemand wat hom oor rou skete kwel nie.
Dit was nie net hy wat sy kans in hierdie “proefwedstryd” aangegryp het nie.
Die veteraan Chase Minnaar het ’n skitterende middag beleef. Hy het die vorige sewesreeks weens ’n motorfietsongeluk misgeloop en die spel het intussen baie verander.
Maar sy ondersteunende en taktiese spel en sy voorgevoel was Woensdag van die boonste rak. Daarmee het hy een van Treu se bekommernisse oor diepte voorlangs effens verlig.
Suid-Afrika het verskeie agterspelers van gehalte. Daar is ook ’n paar spelers in die groter groep wat voor én agter kan speel.
Maar?spesialis-voorspelers soos Frankie Horne, Kyle Brown en Boom Prinsloo is in die minderheid.
Minnaar het dalk net vir hom ’n plek in die groep na Australië oopgespeel.
Maar selfs al kry hy nie nou al die jawoord nie, behoort hy daarna in Doebai of Port Elizabeth te speel.
Die Blitsbok-kaptein, Kyle Brown, het ook gister die eerste keer in ’n wyle ’n stewige veldsessie gehad. ’n Kniebesering het hom tot nou in ’n sweetpak gehou.
Brown kan homself ongelukkig ag dat hy nie in die vorige reeks saam met Afrika ’n benoeming van die IRR ontvang het nie.
Treu sal nie baie afwyk van die groep wat die Londense en Skotse sewestoernooie in Mei gewen het nie.
Maar Cornal Hendricks kan moontlik een van die “hibriede” spelers wees wat sy eerste proesel oorsese rugby kry.
Hy het gister goeie oomblikke beleef, maar sal aan sy verdediging moet skaaf.
Treu se spelers pak die Maties Donderdag om 11:00.
Vir die jongste sportnuus volg Nuus24Sport op Twitter.
– Sport24