Boland help dalk met stutdiepte
2011-10-28 10:01
Kaapstad. – Die Boland-Kavaliers sal straks die Stormers se diepte op vaskopstut in 2012 aanvul indien hulle die voormalige Griekwas-stut Albertus Buckle ’n kontrak aanbied.
Die 28-jarige Buckle het verlede jaar nog vir die Poubloues gespeel en doen tans diens vir die Franse klub Biarritz.
Maar Sport24 verneem hy wil terugkom Kaap toe en dat die Kavaliers belangstel in dié oud-leerder van die Hoër Landbouskool Boland net buite Wellington.
Toe diepte op stut verlede jaar in die Stormers-kamp geneuk het, is Buckle ontbied, maar hy het nooit gespeel nie.
Hoewel hy nog nie ’n reuse-impak op senior rugby gemaak het nie, kan die Kapenaars baat vind deur by hul Super Rugby-vennoot aan te klop – natuurlik mits die Kavaliers Buckle kan bekostig.
Ook sy jonger broer, Chris, het vanjaar vir die Boland haker gespeel.
Nadat die Westelike Provinsie Saterdag in die halfeindstryd van die Curriebeker-reeks teen die Goue Leeus verloor het, het opnuut stemme opgegaan dat ’n belegging in ’n wêreldklas-vaskopstut nodig is.
Maar daardie spelers is skaars en boonop peperduur.
Voorts het Rassie Erasmus, senior professionele afrigter van die WP, Maandag gesê hulle is nie van plan om nou in ’n stut te belê nie, aangesien syne net beseer is en teen die Super Rugby-reeks gereed sal wees.
Die WP se stutte het vanjaar geweldig baie beserings gehad. Gevolglik moes Brok Harris enduit speel, sonder om, soos aanvanklik beoog is, ’n blaaskans te kry.
Vir die jongste sportnuus volg Nuus24Sport op Twitter.
– Sport24