Bokke wen toetsreeks teen Engeland

2012-06-16 23:00

Johannesburg – Die Springbokke het Saterdag die tweede toets op CocaCola-park in Johannesburg teen Engeland gewen om sodoende die reeks van drie wedstryde te beklink.

Die eindtelling was 36-27 nadat Suid-Afrika rustyd voor was met 25-10.

Die Bokke se vertoning in die eerste helfte was briljant en hulle het die Engelse behoorlik teruggeduik in die duikslae, maar dinge het nie so vlot verloop in die tweede helfte nie.

Beserings en veranderings in die agterlyn het die tuisspan ontwrig en die momentum het skielik in die guns van Engeland geswaai.

Morné Steyn het weer 'n nagmerrie met die skopskoen beleef en 'n dapper terugvegpoging deur die Rose het die punteverskil op 'n staduim tot vier laat krimp.

'n Drie in die 73ste minuut deur die vleuel JP Pietersen het die wa deur die drif getrek.

Pietersen is ook as speler van die wedstryd aangewys.

Puntemakers:

Springbokke:

Drieë: Willem Alberts, Bismarck du Plessis, Francois Hougaard, JP Pietersen Doelskoppe: Morné Steyn (2) Strafdoele: Steyn (3) Skepskop: Steyn

Engeland:

Drieë: Toby Flood, Ben Youngs (2) Doelskoppe: Flood (3) Strafdoele: Flood (2)

– Nuus24