‘Bokke stuur af op WB-ramp’
2010-08-08 10:00
Rapport
Johannesburg - Terwyl Suid-Afrika se rugbybaas, Oregan Hoskins, óók deur ’n Sanzar-tugverhoor in die gesig gestaar word, het die sportwetenskaplike prof. Tim Noakes die afgelope week gemaan die Springbokke se Wêreldbeker-veldtog stuur op ’n ramp af omdat die Bokke oud, poegaai en onfiks is.
In ’n persoonlike brief sê Noakes aan Hoskins “noodsaaklike stappe moet dadelik” gedoen word. Dit moet onmiddellik gedoen word indien die span van die Bok-afrigter, Peter de Villiers (wat Vrydag op Sanzar se rooi tapyt was), aanstaande jaar “enigsins” mededingend wil wees wanneer hulle hul Wêreldbeker-kroon in Nieu-Seeland gaan verdedig.
Intussen het Sanzar die afgelope week in ’n brief aan die Suid-Afrikaanse Rugbyunie (Saru) versoek dat Suid-Afrika se rugbybaas beweringe van ’n “oorlogsverklaring deur Nieu-Seeland en Australië teen Suid-Afrika” verduidelik.
Rapport het verlede Sondag eksklusief oor dié beweringe deur talle Suid-Afrikaanse rugbybase berig.
Sanzar ondersoek die moontlikheid dat Hoskins die spel in oneer gebring het.
Noakes sê in sy brief die Bokke is uitgeput weens te veel rugby, kernspelers is te oud vir internasionale rugby en die spelers is nie fiks genoeg om die spel te domineer soos hulle in die verlede gedoen het nie. Hy stel voor dat hulle dadelik ’n ruskans gegee word en nie in die oorblywende Drienasies-toetse speel nie.
Die spelers moet vir solank as agt weke ruskans gegee word, waarna hulle vir ’n verdere vier tot agt weke spesiale fiksheidsprogramme moet volg.
Noakes beveel ook aan dat die Bokke aanstaande jaar voor die Wêreldbeker-toernooi slegs ’n beperkte aantal wedstryde speel sodat hulle vars kan wees vir die toernooi.