Bokke, Engeland gelykop in PE

2012-06-23 23:00

Kaapstad –' n Gelykop uitslag Saterdag op die Nelson Mandelabaai-stadion het die Springbokke van 'n tiende agtereenvolgende oorwinning oor Engeland weerhou.

Die eindtelling van die derde en laaste toets in Port Elizabeth was 14-14 nadat die Bokke rustyd met 9-8 voorgeloop het.

Die Suid-Afrikaners het nie dieselfde vuurkrag gewys waarmee hulle die eerste twee toetse gedomineer het nie en Morné Steyn het die span in die steek gelaat met 'n swak skopvertoning.

Steyn is selfs deur die PE-skare uitgejou toe hy laat in die wedstryd met 'n skepskop misluk het.

In die lynstane het die tuisspan ook gesukkel en voorlangs is Willem Alberts se teenwoordigheid gemis.

Die Springbok-vleuel JP Pietersen het, soos in Johannesburg, die skare op hul voete gehad toe hy in die 61ste minuut oorgeduik het vir 'n drie, maar dit was ook die Bokke se laaste stukkie goeie spel van die wedstryd.

Heyneke Meyer behoort, ná dié flou vertoning, meer vrae as antwoorde te hê wat sy spankeuse vir die opkomende Rugby-kampioenereeks teen Nieu-Seeland, Australië en Argentinië betref.

Puntemakers:

Suid-Afrika:

Drieë: JP Pietersen Morné Steyn Strafdoele: Steyn (3)

Engeland:

Drieë: Danny Care Strafdoele: Toby Flood (2) Owen Farrell

Wat dink jy? Wie in die span moet bly en wie moet ry? Deel jou mening mening hier.

Vir die jongste sportnuus volg Nuus24Sport op Twitter.

– Nuus24