Bokbelaaide WP kan Leeus op tuisveld klop
2011-10-17 10:04
Kaapstad – Die o.19-, o.21- en Curriebeker-rugbyspanne van die Westelike Provinsie speel in die naweek in die halfeindronde van hul onderskeie reekse.
En hoewel die senior Streeptruie deur ’n klompie spelers wat nog nat agter die ore was in die posisie geplaas is om te kwalifiseer, het hul breier, Allister Coetzee, Saterdag ná hul sege van 43-18 oor die Pumas gesê “ons weet Kaapse ondersteuners soek ongeag die omstandighede ’n tuishalfeind”.
Die WP reis egter as die vierde span op die Curriebeker-puntelys Johannesburg toe om die Goue Leeus die tweede keer in twee weke die stryd aan te sê.
Hoewel die Streeptruie uiteraard ’n tuishalfeindstryd sou verkies, is hulle straks in ’n beter posisie as enige van die ander spanne in die halfeindronde.
Die Vrystaat lê in Durban by die Haaie besoek af en laasgenoemde se groep is stewig gelaai met Wêreldbeker-Springbokke.
Die Leeus is nie. Butch James is wel daar, maar sal vanweë Elton Jantjies se uitstekende Curriebeker-reeks straks as Doppies la Grange se sentermaat moet diens doen – teen Jean de Villiers, Jaque Fourie en Juan de Jongh.
Die Leeus se enigste ander Springbok is CJ van der Linde. Maar hy was nie deel van die Gautengers se strukture sedert hy daar ’n kontrak onderteken het nie.
Voorts het die Leeus in die naweek met ’n amperse B-span teen die Haaie pak gekry. Hul breier, John Mitchell, wou sy diepte daarmee uitbou sonder om momentum prys te gee. Net tyd sal leer of daardie plan gewerk het – volgens die telbord het dit nie.
Die WP sal effens bekommerd wees oor die wyse waarop die Pumas hom in die vaste fasette opgekeil het.
Maar met ses Bokke terug en die herinneringe aan ’n mislukte poging teen die Leeus maar ’n week oud, behoort hulle beter voorbereid te wees vir die halfeindstryd. Dis nou wel vooruitpraat, maar as die Vrystaat en die Haaie mekaar soos gewoonlik aan die keel gryp en indien die WP volgens sy vermoë speel, kan die Kapenaars bes moontlik teen ’n krank span in die eindstryd speel.
“Maar moenie die Leeus onderskat nie,” het Coetzee sy span gewaarsku.
“Die Leeus is geweldig fiks. Dit is een van hul grootste bates op die Hoëveld en iets wat ons laas gevang het.”
Die WP-kaptein, Jean de Villiers, het erken dat sy span nog skaafwerk moet doen:
“Hierdie was nie ’n mooi wen teen die Pumas nie. Maar dit het ons ’n halfeindstryd besorg – meer as wat die Bokke kan sê.”
Vir die jongste sportnuus volg Nuus24Sport op Twitter.
– Sport24