Bok-slot vort na Frankryk

2012-12-18 12:44

Johannesburg – Die Springbok-slot Juandré Kruger sal die Bulls ná volgende jaar se Superrugby-seisoen verlaat en by die Franse klub Racing Metro aansluit.

Frans Ludeke, hoofafrigter van die Bulls, het erken dat dit moeilik is vir Suid-Afrikaanse franchises om die finansiële aanbiedinge van Europese klubs te ewenaar.

"Dit is altyd goed om te weet en te hoor dat jou spelers regoor die wêreld gesoek word, maar dit is ongelukkig nie altyd moontlik om hulle te behou wanneer die aanbiedings begin inkom nie."

Hoewel die Bulls gretig was om Kruger se kontrak te verleng, het Ludeke gesê dit is weens finansiële druk nie moontlik nie.

"Ons is bly vir Juandré en dit is 'n wonderlike aanbod wat hy ontvang het, maar ons kan dit ongelukkig nie ewenaar nie."

Ludeke glo Kruger het nog baie om te bied vir die Pretoriase span in volgende jaar se Superrugby-kompetisie.

– Volg Nuus24Sport op Twitter

- SAPA