Bok-ondersteuners het gemengde gevoelens

2012-06-24 13:29

Johannesburg – Die eindtelling van 14-14 tussen die Springbokke en die Rose het gemengde reaksies onder Suid-Afrikaanse ondersteuners ontlok.

“Dit was ‘n bietjie teleurstellend. Ons moes die wedstryd gewen het, maar onder omstandighede weet ons hulle het reeds twee wedstryde gewen en die weer en als is ‘n faktor. So weereens baie geluk aan die Springbokke...” het ‘n aanhanger aan die SABC gesê.

Die Suid-Afrikaners het nie dieselfde vuurkrag gewys waarmee hulle die eerste twee toetse gedomineer het nie en Morné Steyn het die span in die steek gelaat met 'n swak skop-vertoning.

“Ons is nie gelukkig met Steyn nie en ons is nie gelukkig daarmee dat Elton Jantjies nie ‘n kans gekry het nie... Steyn het die drie toetse opgemors en Elton Jantjies kon ten miste vyf minute se speeltyd kry...” het ‘n ander ondersteuner gesê.

Die eindtelling van die derde en laaste toets in Port Elizabeth was 14-14 nadat die Bokke rustyd met 9-8 voorgeloop het.

Vir die jongste sportnuus volg Nuus24Sport op Twitter