Blou Bulle gee Bees trekpas
2011-10-06 09:16
Pretoria – Die Blou Bulle Maatskappy (BBM) het die stut Bees Roux finaal die trekpas gegee.
Roux (28) is Woensdag in ’n tugverhoor deur die BBM skuldig bevind dat hy sonder toestemming by die Pumas-rugbyspan geoefen het.
Sy ontslag tree dadelik in werking.
David Short, voorsittende beampte in dié verhoor, het Woensdag in sy uitspraak gesê hoewel Roux nie van oneerlikheid aangekla is nie, is dit sy siening dat Roux se dade “per implikasie oneerlik was”.
Adv. Gert van der Merwe, Roux se regsverteenwoordiger, het daarop gesê iemand kan nie skuldig bevind word van iets waarvan hy nie aangekla word nie.
Roux het in Augustus verlede jaar die Tshwane-metropolisielid sers. Johannes Ntshimane Mogale (38) doodgeslaan, maar Roux is nie op dié klag, dat hy die rugby-unie se naam in oneer gebring het, verhoor nie.
“Roux het duidelik sy eie belang bo dié van sy werkgewer (BBM) geplaas deur by die Pumas te oefen. Die werknemer het deurgaans ... volgehou dat hy niks verkeerd gedoen het nie en het geen berou getoon nie,” het Short gesê.
Roux het getuig hy was onder die indruk dat hy toestemming gehad het om by die Pumas te oefen.
Short het in sy uitspraak gesê dat die BBM dit duidelik gestel het dat hulle nie Roux se kontrak einde Oktober gaan hernu nie en dat ontslag dus die enigste opsie is.
Vir die jongste sportnuus volg Nuus24Sport op Twitter.
– Sport24