Blitsige Nokwe terug in Oos-Kaap
2011-11-12 08:32
Bloemfontein – Een van die Oostelike Provinsie se verlore seuns sal in 2012 sy geboorteprovinsie op die rugbyveld verteenwoordig.
Die Springbok-vleuel Jongi Nokwe het ’n kontrak van ’n jaar met die Oostelike Provinsie-Kings gesluit.
’n Kringloop in dié boorling van Ngxalawe in die Oos-Kaap se lewe is nou voltooi en hy wil sy rugbyloopbaan in Port Elizabeth weer op koers kry. Nokwe se kontrak met die Vrystaat het einde Oktober verstryk.
Die Cheetahs probeer egter steeds om die 29-jarige Nokwe se dienste vir volgende jaar se Super Rugbyreeks te bekom, maar daarvoor sal die Kings toestemming moet gee.
Sport24 het onlangs berig dat die Kings Nokwe wil kontrakteer en dat hy ’n paar weke gelede fiksheidstoetse in die Baai afgelê het. Naka Drotské, die Vrystaat se afrigter, het ook gesê sy begroting laat dit nie toe om dié vleuel te behou nie.
Hawies Fourie, agterlyn-afrigter van die Cheetahs, het gesê hy is bly om Nokwe se onthalwe. “Hy het ’n geleentheid om weer sy rugby by die Kings op koers te kry,” het hy gesê.
Dié breier hoop die Cheetahs kan ’n ooreenkoms met die Kings bereik sodat Nokwe steeds volgende jaar Super Rugby vir die sentrale streekspan sal speel.
Die blitsige Nokwe, van die voormalige Ciskei, het nie in 2011 vir die Cheetahs uitgedraf nie. Hy het in September verlede jaar die ligamente in sy linkerknie geskeur en dié besering het verhoed dat hy vanjaar Super Rugby of Curriebeker-rugby in die Premierliga speel.
Dié Springbok was teen die einde van 2011 se Curriebeker-reeks byna heeltemal fiks en het as Vrystaat-leenspeler vir die Griffons in die reeks se Eerste Liga uitgedraf.
Sy peil was toe nog nie na wens nie en daarom het hy eers weer hier aan sy kondisionering gewerk.
Die vleuels in die Cheetahs se voorlopige Super Rugbygroep is Rayno Benjamin, Cameron Jacobs, Philip Burger, Rocco Jansen en Dusty Noble. Ander agterspelers wat ook op vleuel ingespan kan word, is Riaan (True Blue) Smit, Wilmaure Louw, Nico Scheepers en Philip Snyman.
– Sport24
– Bly op hoogte van al die jongste sportnuus deur Nuus24Sport op Twitter te volg