Blitsbokke saam't Aussies in groep vir ‘afskop’
2011-11-08 08:57
Kaapstad. – ’n Goue begin oor die tuisspan aan die Australiese Goue Kus sal vir die Blitsbokke ’n blink afskop in die Wêreld-sewesreeks verseker.
Die Blitsbokke is Maandag saam met onder andere Australië in Groep B ingedeel vir die Goue Kus-toernooi wat op 25 November begin en die Internasionale rugbyraad se reeks vir die 2011-’12-seisoen inlui.
Drie toernooiseges in die vorige reeks het Suid-Afrika algeheel tweede laat eindig.
Gevolglik is hy en die reekswenner, Nieu-Seeland, Maandag outomaties as die top-spanne in Groepe B en A geloot. Die lande wat tussen derde en agtste geëindig het, se name is toe getrek om die eerste twee spanne in elk van die vier groepe te bepaal. Só het Suid-Afrika en Australië in dieselfde groep beland.
Die Aussies het die vorige reeks as ’n vroeë gunsteling begin. Hulle het ’n uitstekende span gehad, maar sy jeugdigheid het hom eindelik ingehaal.
Die Blitsbokke behoort die Aussies voor hul eie mense wel op hul gevaarlikste aan te tref.
Die ander twee spanne in groep B is Japan en Amerika. Die Yanks word deur Al Caravelli afgerig en hoewel hy nie dieselfde spelerarsenaal het nie, dink hy en Paul Treu van Suid-Afrika baie dieselfde oor sewesrugby.
Dit maak hom as breier gevaarlik, maar sy span behoort nie die skietgoed te hê om die Bokke te laat struikel nie. Dieselfde geld Japan, hoewel daardie kêrels uiters fisiek en vaardig is – en dít sonder ’n stewige kontingent Kiwi’s in hul geledere.
Hoewel daar weinig maklike wedstryde in hierdie reeks is, sal die Blitsbokke die lewe vir hulle draagliker maak deur Australië reeds op die eerste dag te klop.
Die wenner van Groep B pak die span wat tweede geëindig het in Groep C in die kwarteindronde en omgekeerd. Samoa behoort Groep C te wen, met Frankryk of Argentinië wat ook die kwarteind sal haal. Samoa is stuitbaar, maar ’n fisiek veeleisende teenstander voor ’n halfeindronde en die eindstryd op dieselfde dag.
Die volledige loting is:
Groep A: Nieu-Seeland, Fidji, Kenia, Niue.
Groep B: Suid-Afrika, Australië, Amerika, Japan.
Groep C: Samoa, Argentinië, Frankryk, Papoea Nieu-Guinee.
Groep D: Engeland, Wallis, Skotland, Tonga.
Vir die jongste sportnuus volg Nuus24Sport op Twitter.
– Sport24