Blitsbokke kry versterkings

2012-12-03 16:49

Kaapstad – Die Blitsbok-staatmaker Cecil Afrika is een van drie spelers wat hom by die groep aangesluit het vir die Internasionale Rugbyraad (IRR) se sewesreeks in Port Elizabeth die naweek.

Afrika se finale insluiting hang egter af van ‘n fiksheidstoets wat hy later die week moet slaag.

Bernado Botha en Cheslin Kolbe is die ander twee spelers wat by die groep aansluit ná die Blitsbokke se kaptein, Kyle Brown, sy enkel gebreek het.

Die afrigter Paul Treu sal sy finale groep van 12 Donderdag aankondig, het sarugby.co.za berig.

Die Blitsbokke sal teen Samoa, wat Saterdag die Doebai-toernooi gewen het, sowel as Frankryk en Australië in Groep A in Port Elizabeth speel.

Suid-Afrika het Saterdag met 14-10 teen Argentinië in die eindstryd van die Skildtoernooi verloor en is tans in die sesde plek op die wêreldreeks se punteleer.

– Vir die jongste sportnuus volg Nuus24Sport op Twitter.