Blitsbokke 7de ná teleurstelling in NS
2010-02-08 08:52
Bloemfontein – Die Blitsbokke sal, gemeet aan die huidige vorm van spanne soos Fidji, Samoa en Nieu-Seeland, vanjaar sukkel om hul kroon suksesvol in die Internasionale Rugbyraad se Sewesreeks te verdedig.
Nieu-Seeland is ná die toernooie in Doebai, George en Wellington met 64 punte die huidige voorloper, gevolg deur Fidji met 60 en Samoa met 46.
Die Blitsbokke is met 24 punte slegs in die sewende plek. Suid-Afrika lyk in die afwesigheid van sterre soos Lionel Mapoe, Philip Snyman en Robert Ebersohn nie opgewasse vir die grotes in dié weergawe van die spel nie.
’n Bewys daarvan was die wyse waarop Australië die Suid-Afrikaners Saterdag in Wellington in die Plaat-eindstryd geklop het.
Nadat die Blitsbokke rustyd met 17-7 voorgeloop het, het die Aussies in die tweede helfte hul tempo verhoog om met 26-22 te seëvier.
Foute op kritieke tye in dié wedstryd het die Blitsbokke duur te staan gekom.
Dit is duidelik dat die Suid-Afrikaners een of twee ware spelbrekers nodig het ten einde in die oorblywende toernooie saam met die groot honde te blaf.
Suid-Afrika is in Wellington in die kwarteindstryd met 21-5 deur Fidji uitgeskakel wat die Blitsbokke fisiek byna geboelie het.
Fidji het voortgegaan om die titel te verower deur Samoa met 19-14 in die eindstryd te klop.
Suid-Afrika ding eerskomende naweek in Las Vegas in dieselfde groep as Kanada, Amerika en Fidji mee.
Paul Treu, hoofafrigter van die Suid-Afrikaanse span, sal op die knoppies van senior spelers soos Frankie Horne, Mzwandile Stick en Ryno Benjamin druk wat die afgelope tyd nie juis die wêreld aan die brand gespeel het nie.
Spelers soos die opwindende Cecil Afrika moet Treu nietemin moed gee.
– Beeld