Blits-trane
2011-12-04 07:04
Dubai – Ai tog, Blitse. Dít is mos nie soos ons julle leer ken het nie.
Suid-Afrika het hier by die Emirates Airlines-toernooi met nederlae teen Frankryk en Australië, maar ’n sege oor Wallis, behoorlik soet-en-suur rugby gespeel.
Ná Vrydag, toe die span sy verpligtinge in groep B onoorwonne en op indrukwekkende wyse afgesluit het, is heelwat Saterdag verwag en was die Blitsbokke onder die groot gunstelinge om ’n vierde toernooi-titel in Dubai te wen.
Maar die Blitse het reeds in die kwarteindstryd, hul eerste wedstryd vir die dag, teen Frankryk vasgeval.
Dié 5-19-nederlaag het boonop vir Kyle Brown en sy manne gevlei, want dit was een van daardie onverklaarbare vertonings.
Die span het 8 van sy 20 duikslae gemis en soos verlede week in Australië tydens die Internasionale Rugbyraad se openingstoernooi vir sy 2011/12-seisoen, ’n beheptheid met kontak, eerder as spasie, gehad.
Hulle is oordonder deur ’n span teen wie hulle verlede week kon seëvier.
In hul volgende wedstryd, teen Wallis in die halfeindronde van die Plaat-kompetisie, was die Blitse weer, wel blitsig.
Weg was die beheptheid met kontak maak en is spasie en spoed gebruik om die Walliesers met 22-7 te verslaan.
Dit het die Blitse teen Australië te staan laat kom in die eindstryd van die Plaat-kompetisie.
Gegewe die Blitse se dubbeldoor-sege oor die Aussies verlede week en hul spelpeil teen Wallis, was daar weer hoop.
’n Puik drie, in die laaste sekondes van die wedstryd deur die Aussies se Lewis Holland, het egter die Blitse dié titel gekos. Holland het goed 60 meter deur die Blitse se wanhopige en flouerige duikslae gebars om sy span met 17-14 te laat wen.
“Ons het hierdie toernooi nie volgens ons potensiaal gespeel nie,” het die afrigter Paul Treu agterna erken.
“Dit is bitter teleurstellend as jy soveel vooraf insit en dan so min terugkry. Ons is tot meer in staat as om ’n verslane finalis in die Plaat te wees.”
Daar wag beslis kopkrap op Treu voor komende naweek se toernooi in Port Elizabeth.
“Cecil Afrika behoort reg te wees en dit kan ’n verskil maak,” het Treu gesê. “Ons sal egter meer moet wys vir dit wat ons insit. Ons getal punte ná twee toernooie vir ’n span wat ten volle professioneel is, is nie goed genoeg nie.”
Die Blitse is saam derde op die punteleer en het soos Nieu-Seeland en Frankryk 29 punte.
Fidji (39) is voor, gevolg deur Engeland (32).
Engeland het uiteindelik die toernooi gewen deur Frankryk met 29-12 te klop. Die Engelse het Fidji in die een halfeindstryd geklop en Frankryk was te sterk vir Argentinië in die ander uitklopstryd.
Die swak vertonings van Samoa en Nieu-Seeland hier was ’n groot besprekingspunt. Die Kiwi’s het vir die eerste keer in hul geskiedenis drie keer in ’n ry verloor, terwyl Samoa nie eens die kwarteindronde kon haal nie.
Die SA vrouespan het ’n droewige toernooi gehad. Hulle het op die eerste dag drie keer verloor. Gister het hulle weliswaar met 19-5 teen Brasilië gewen, maar daarna met 28-0 teen Spanje in die eindstryd van die Plaat-finaal verloor.
Kanada het dié toernooi gewen deur Engeland in die eindstryd te klop.
Vir die jongste sportnuus volg Nuus24Sport op Twitter
– Sport24