‘Blits-proewe’ teen die Ikeys
2011-11-09 08:24
Stellenbosch. – Die Blitsbok-toergroep vir die eerste toernooi in die Internasionale Rugbyraad (IRR) se Wêreldsewesreeks vir 2011/’12 word oor twee dae aangekondig.
Diegene wat nog nie seker is van ’n plek in dié uitsoekgroep nie, kry Woensdagmiddag teen die Ikeys die kans om te wys dat hulle in die span hoort.
Die Wêreldreeks begin op 25 November in Brisbane aan die Australiese Goue Kus. Anders as in die verlede, begin die reeks vanjaar met drie agtereenvolgende toernooie en nie twee nie.
Paul Treu, die Blitsbok-breier, het aan Sport24 gesê ’n goeie begin in Brisbane en ’n knap vertoning in die plaaslike toernooi in Port Elizabeth is nou die span se hoofdoelwitte.
Tussenin vind die toernooi in Doebai plaas, maar as die Blitsbokke ’n gunstige loting in die Baai wil hê, sal hulle goed moet doen in dié woestynstad.
Dit is vanjaar moeiliker as voorheen om die groter groep spelers reg te bestuur en met die onafwendbaarheid van beserings, om die sterkste span te kies.
Cecil Afrika, die Suid-Afrikaanse en IRR-sewesspeler van die jaar, sal waarskynlik albei die eerste toernooie weens ’n wangbeenbesering misloop.
Branco du Preez het hom al as losskakel vervang en heel spoggerig gelyk, maar dié kêrel het in Mei ’n enkelskeet opgedoen, wat stadiger herstel het as wat die span gehoop het.
Hy het wel gister hier sonder ongemak aan ’n semi-kontakoefening deelgeneem en Treu oorweeg dit om hom vandag vir ’n paar minute teen die Varsitybeker-kampioen los te laat.
Die Blitsbokke speel ook Donderdag hier teen Maties.
Ondanks enkele bekommernisse oor die voorspelers, is die algemene gevoel dat die span straks beter voorbereid is as verlede jaar hierdie tyd.
Die Blitsbokke is toe Doebai toe met ses spelers wat nog nooit daar uitgedraf het nie.
Die groep is vanjaar meer ervare en boonop het die span albei sy laaste toernooie in Mei gewen – in Londen en Edinburg.
Die nuwelinge in die groep lyk ook baie goed.
Die heers ook ’n besonderse kameraderie in die groep, met senior spelers soos Frankie Horne en Neil Powell wat die stemming deurgaans op die oefenveld op die verlangde vlakke hou.
Met soveel nuwe spelers in die groep, was dit verlede jaar amper geforseerd, wat nou vir spontaneïteit plek gemaak het.
Vir die jongste sportnuus volg Nuus24Sport op Twitter.
– Sport24