Beursies moet nou WP-misnoeë wys
2011-10-24 08:00
Johannesburg. – Dit is moeilik om te verwoord wat die Westelike Provinsie Saterdag hier in die halfeindronde van die Curriebeker-rugbyreeks teen die Leeus aangevang het toe hy met 20-29 verloor het.
Veral omdat die Streeptruie – sonder om te laat weet – ’n vroeë vlug Kaap toe gehaal en nie vir die nuuskonferensie opgedaag het nie.
Dié was hul vierde nederlaag in uitkloprugby die afgelope 17 maande. Nadat die Stormers en die WP in 2010 in die eindstryde van die Super14- en die Curriebeker-reeks gespeel het, het Kaapse ondersteuners heimlik gehoop dat hulle vanjaar ’n verdere opwaartse kurwe sou toon.
Maar daar was toe net halfeindstryde teen ’n uitgedunde Crusaders-span en die Leeus, wat baie meer hart as talent het. Die Kapenaars het albei sonder waardigheid verloor.
John Mitchell, Leeus-breier, het Saterdag oor die WP se Springbok-aanslag gesê: “Ek bekommer my nie oor individue wat al ’n internasionale trui gedra het nie. Ek het van die begin af gesê die beste span gaan die reeks wen, nie individue nie.”
En dit was die groot verskil. “Vir baie van ons kan dié die grootste rugby wees wat ons ooit speel. Ons het nie ’n ander keuse as om vir mekaar te speel nie,” het Josh Strauss, kaptein van die Leeus, gesê.
Maar in soverre dié wedstryd Springbok-rugby in die toekoms gaan raak, is daar rede tot kommer.
Hulle is almal topklas-individue, maar Schalk Burger se leierskap en sy breiers se vermoë om ’n span na die volgende vlak te neem, kan nou met reg in twyfel getrek word. Hy word as ’n volgende Bok-kaptein genoem. Maar sy ongeduld of onwilligheid om geleidelik ’n agterstand weg te beitel, raak ’n chroniese toestand.
Met meer as 30 minute oor was die WP met 12-19 agter. Hy het ’n strafskop reg voor die pale gekry, maar Burger het verkies om lyn toe te skop. Tiaan Liebenberg het ’n strafskop by die lynstaan afgestaan. Spel is na die WP se gebied verplaas en Michael Killian het ’n onderskepdrie gaan druk. Die gevolg van ongeduldige kapteinskap?
Die WP se ringkoppe sal na die seisoen kyk en sê dit was ’n sukses vanweë die ontwikkeling van jong spelers. In daardie opsig was dit.
Maar ’n miskenning van korttermyn-sukses, wat nou al ’n lang pad aankom, maak besteding op ’n hoëdefinisie-TV en ’n goeie braairooster nou ’n beter belegging as ’n Nuwelandse seisoenkaartjie. Die WP vertel dikwels hoe wonderlik dit is dat mense ondanks die gebrek aan ’n beker steeds na Nuweland stroom.
Maar dalk is die feit dat hy op 27 000 seisoenkaartjiehouers en inkomste staatmaak waarom die WP bly dobber in stormwaters, terwyl hy in werklikheid ’n skipper met toekomsvisie nodig het.
Vir die jongste sportnuus volg Nuus24Sport op Twitter.
– Sport24