'Besope' Percy het in tjoekie geslaap
2009-10-09 12:18
Durban - Die Springbok-legende Percy Montgomery was glo dronk en het 'n nag in die aanhoudingselle deurgebring ná hy glo sy vrou en haar familie aangerand het.
Supt. Vincent Mdunge, 'n polisiewoordvoerder, het gesê Montgomery was dronk en die rusie tussen hom en sy vrou, Tasmin, het kort ná 'n ete by die Oyster Box in Umhlanga gebeur.
Mdunge het bevestig dat Montgomery in aanhouding was.
"Daar is bewerings dat hy fisieke geweld gebruik het om sy vrou en van sy skoonfamilie, waaronder sy skoonpa, te beseer."
Montgomery is Sondag in hegtenis geneem op aanklag van aanranding met die doel om ernstig te beseer en het Maandag in die Verulam-landdroshof verskyn. Hy is op borgtog van R1500 vrygelaat.
Mdunge het gesê Tasmin het 'n saak wat verband hou met "gesinsgeweld" by die Durban-Noord-polisiekantoor aanhangig gemaak.
Hy het gesê in die stadium is dit nie duidelik wat die rusie veroorsaak het nie.
Luidens die klagstaat is Montgomery se borgtogvoorwaardes dat hy nie sy vrou aanrand, dreig of verbaal mishandel nie. Hy mag ook nie met haar ouers kommunikeer, hulle dreig of teister nie.
Montgomery het glo sy vrou se "boud gedruk en haar met die vuis geslaan", lui die klagstaat.
Die saak is tot 6 November uitgestel vir verdere ondersoek.
– Sport24