Beserings pla Wallis voor toets
2010-11-10 07:12
Cardiff. – Wallis se rugbyspan het nog ’n terugslag beleef voor Saterdag se toetswedstryd teen die Springbokke toe bevind is dat die belowende flank Sam Warburton sy kuitspier geskeur het.
Warburton sal na verwagting al Wallis se toetswedstryde in November misloop, maar sy waarskynlike plaasvervanger het weliswaar geen bekendstelling aan toetsrugby nodig nie.
Die gewilde Martyn Williams, ’n veteraan van 96 toetswedstryde, sal waarskynlik teen Suid-Afrika uitdraf.
Warburton het ’n groot impak gemaak toe hy Saterdag in Wallis se nederlaag met 16-25 teen Australië in aksie was.
Die Rooi Drake het darem ook goeie nuus gehad. Dit lyk dit of die heelagter Lee Byrne en die losvoorspeler Ryan Jones hul terugkeer teen die Bokke kan maak.
Byrne en Jones het albei aan Dinsdag se oefening deelgeneem.
Byrne het die Wallaby-wedstryd weens ’n gebreekte been in sy hand misgeloop.
As hy wél teen die Bokke as heelagter speel, kan die talentvolle James Hook moontlik van heelagter na binnesenter of losskakel skuif.
Dit kan Hook toelaat om sy skeppende vermoëns veel meer te gebruik as wat die geval uit die laaste vesting teen Australië was.
Wallis sal steeds sonder die beseerde agterspelers Leigh Halfpenny, Jonathan Davies en Jamie Roberts moet klaarkom.
Die Walliese afrigter, Warren Gatland, gaan sy span eers môre aanwys en wil die beseerdes duidelik genoeg kans gee om te herstel.
Gatland wil Wallis graag tot slegs ’n tweede oorwinning in 104 jaar van toetsrugby oor Suid-Afrika lei.
Wallis se enigste sege oor die Bokke was in 1999.
Intussen het die Springbok-agtsteman, Pierre Spies, volgens die Western Mail sy verbasing uitgespreek dat daar in Wallis oor die moontlike weglating van die fris skrumskakel, Mike Phillips, kopgekrap word.
Die voormalige Walliese skrumskakel Terry Holmes het vandeesweek ook aan die Western Mail gesê Phillips moet deur die meer dinamiese Richie Rees vervang word.
Phillips het ’n sukkelvertoning teen die Wallabies gelewer, maar Spies beskou hom steeds as ’n gevaarman.
“Hy (Phillips) stel altyd vrae aan die verdediging rondom die afbreekpunte.
“En dit is waar die meeste vrae gevra gaan word,” het Spies gesê.
Holmes glo ook dat die gesoute losskakel Stephen Jones liewer deur Hook vervang moet word.
Volgens Holmes sal Phillips se weglating aan die speler “’n skop onder die agterstewe” gee.
“Hy was een van die beste skrumskakels in die wêreld en kan dit weer wees.
“Maar hy moet eers weer sy ou spelpeil herwin,” het Holmes gesê. “Richie se peil is goed en hy bied ’n vinniger diens as skrumskakel as Mike.”
Bly op hoogte van al die jongste sportnuus deur Nuus24Sport op Twitter te volg.
- Sapa - AFP