Bekker, Liebenberg uit Bok-toer

2012-10-17 07:35

Kaapstad – Die Springbokke het nog 'n terugslag beleef met die nuus dat die slot Andries Bekker en haker Tiaan Liebenberg die span se jaareind-toer na Europa sal misloop.

Die WP het Maandag bekendgemaak dat die twee spelers nie in Saterdag se Curriebeker-halfeindstryd teen die Leeus in Johannesburg gaan speel nie.

Bekker het sy toon in laas naweek se oorwinning oor die Cheetahs beseer en Liebenberg het in dieselfde kragmeting sy rug seergemaak.

Alhoewel die Streeptruie huiwerig is om te sê wat die erns van die beserings is, het Sport24 betroubaar verneem dat Bekker ses tot agt weke op die krukkelys sal wees terwyl Liebenberg waarskynlik twee tot drie maande uit is.

Dis 'n reuse terugslag vir die Bokke, wat reeds sonder Coenie Oosthuizen (rug) en Johan Goosen (knie) moet klaarkom.

Die Springbokke begin hul Europese toer teen Ierland in Dublin op 10 November gevolg deur toetse teen Skotland in Edinburg (17 November) en Engeland in Londen (24 November).

Vir die jongste sportnuus volg Nuus24Sport op Twitter.

– Sport24