Beast uit Bok-toer, WP-stut opgeroep
2012-11-12 13:19
Kaapstad – Die Bok-stut Beast Mtawarira sal na SA terugkeer nadat besluit is dat dit in sy beste belang sal wees om nie met die oorsese toer voort te gaan nie.
Mtwarira is Saterdag uit die span, wat teen Ierland in Dublin sou uitdraf, onttrek weens onreëlmatige hartkloppings. Dié toestand is oorerflik.
"Ons het met Beast en die kardioloog in Durban geraadpleeg en alhoewel dit veilig is vir hom om te speel, het ons besluit dit is beter as hy na Suid-Afrika terugkeer om te rus," het die Bok-breier, Heyneke Meyer, Maandag gesê.
"Hy het dit al verskeie kere vantevore gehad en dit is altyd reg bestuur," het Craig Roberts, die Bokke se spandokter, gesê.
"Hy sal egter weer 'n soortgelyke prosedure as die een wat hy in Februarie in Kaapstad gehad het, moet ondergaan."
Die WP-speler Frans Malherbe is as plaasvervanger-stut opgeroep. Die besluit om Malherbe, wat 'n vaskopstut is, op te roep is egter gemaak omdat Jannie du Plessis sy enkel seergemaak het.
Guthro Steenkamp behoort ook weer fiks te wees vir die naweek se toets teen Skotland.
Vir die jongste sportnuus volg Nuus24Sport op Twitter.
– Sport24
