Beast laat Lions tou opgooi
2011-01-19 09:07
Johannesburg - Die Lions het uiteindelik bes gegee met Tendai (Beast) Mtawarira en aanvaar hy sal nie vanjaar vir hulle in die Super15-reeks speel nie.
Mtawarira het die Goue Leeus Rugbyunie (GLRU) meegedeel dat hy by die Sharks gaan bly waar hy saam met die broers Du Plessis, Bismarck en Jannie, asook John Smit, deel van ’n Springbok-voorry is.
Daarmee het die GLRU se voorlopige inkopies ook vir eers tot ’n einde gekom, hoewel nog met drie oorsese spelers onderhandel word wat hulle later in die jaar by die unie kan aansluit.
Kevin de Klerk, president van die GLRU, het dié nuus Dinsdag op ’n mediakonferensie bevestig waar die Lions se kaptein van die Superrugby-reeks aangekondig is.
Die afrigtingspan, onder leiding van John Mitchell, het ’n wyse besluit geneem en die Curriebeker-kaptein van verlede jaar, Franco van der Merwe, as kaptein behou.
Doppies la Grange, wat as senter verlede jaar sy beste seisoen tot nog toe beleef het, sal weer die onderkaptein wees.
Van der Merwe is bo Cobus Grobbelaar en Wikus van Heerden as die Lions se kaptein gekies.
“Ek moes in ag neem dat ons kaptein vir seker in die beginspan moet wees. Voorts het ek al ’n goeie verstandhouding met dié twee leiers (Van der Merwe en La Grange) in die Curriebeker-reeks opgebou,” sê Mitchell.
“Franco is ’n voorbeeldige leier en pas goed by ons nuwe waardes in. Hy is ook ’n intelligente ontleder.”
Mitchell het egter aan Grobbelaar en Van Heerden – hy beskou hulle as natuurlike leiers – gesê hy verwag steeds van hulle om leiding op die veld te gee.
Volgens Mitchell was Grobbelaar teleurgesteld omdat hy die kapteinskap moes prysgee, maar hy is vuur en vlam om sy deel vir die span by te dra.
Grobbelaar het ’n skoueroperasie ondergaan en volgens Mitchell lyk dit of ’n groot seisoen vir Baywatch, soos Grobbelaar bekend is, voorlê.
Hy moet wel met die jonger Derick Minnie en Jaco Kriel as die span se baljagter meeding.
Van Heerden sal as flank en slot oorweeg word, maar is nie van ’n plek in die beginspan verseker nie.
Van der Merwe het te kenne gegee dat hy hoofsaaklik as slot oorweeg gaan word.
Ander slotte in die Lions se groep is George Earle, Michael Rhodes, David Bulbring en David de Villiers.
Volgens Van der Merwe is hy bevoorreg om kaptein te wees. “Veral aangesien daar goeie leiers is wat ná hul beserings nou weer beskikbaar is.
“Boonop het nuwe spelers, wat self goeie leiers is, hulle by ons aangesluit.
“Maar hulle sal goeie hulp aan my kan verleen.”
Vir die jongste sportnuus volg Nuus24Sport op Twitter.
- Sport24