Beast dalk ook na Leeus
2010-12-14 22:45
Sport24
Johannesburg - Die Beast kan aanstaande jaar saam met die Leeus brul, eerder as om saam met die Haaie te swem.
Tendai (Beast) Mtawarira, ’n Springbok-stut van die Sharks, het glo ’n aanbod van die Leeus gekry wat hy beswaarlik kan weier.
Daar word ook al in Sharks-kontrei gepraat dat hy op pad is Johannesburg toe, maar Brian van Zyl, die uitvoerende hoof van die Sharks, het gister gesê hy het in Oktober ’n kontrak vir nog drie jaar gesluit met die Durbaniete en dat hy gedwing sal word om dit te eerbiedig.
“Ons sal hom nie sommer laat gaan nie, hoewel ons bewus is dat hy deur die Leeus gekontak is,” sê Van Zyl.
Ingeligte bronne sê die Sharks het dit glo ook duidelik gemaak aan Mtawarira dat hulle die unie was wat hom in Zimbabwe gaan haal het en hom die kans gegee het om so ’n stewige vastrapplek in Suid-Afrika te kry.
Dié emosionele kaart wat daar nou uit Durban voor sy neus geswaai word, moet as teenvoeter dien vir die massiewe bedrag wat die Leeus se nuwe eienaars glo bereid is om vir Mtawarira te betaal.
Dit is geen geheim nie dat die Sharks baie teleurgesteld is in die moontlikheid dat hy dalk verlore kan wees en hy moontlik groener weivelde wil soek.
Daar is selfs diegene wat reguit sê hy kan gewis verlore wees en dat van sy reklame-betrokkenheid by die Durbaniete glo reeds ingeperk is.
Die Sharks se tuiste sal ook van aanstaande jaar nie meer as Absa-stadion bekend staan nie.
- Volg Nuus24 Sport op Twitter. Kliek hier.