Bakkies weer ’n Bul
2010-09-07 10:06
Pretoria – “Dit is lekker om terug te wees.”
Dié opmerking kom van Bakkies Botha, maar kan netsowel die amptelike kommentaar van die Blou Bulle wees.
Die Curriebeker-rugbykampioene is ná hul gespierde vertoning Saterdag teen die Haaie weer terug tussen die voorlopers op die puntelys en ruk dié Saterdag op Vrystaat toe om hul segetog in die reeks verder te probeer voer.
Botha, wat pas ’n skorsing van nege weke uitgedien het, is reg om sy provinsiale vennote in dié stryd te help en sal ná verwagting as slot uitdraf.
Sy vertoning word met groot afwagting ingewag.
Hy kan dalk wedstrydoefening kortkom, maar hy het die laaste maand of wat ’n kondisioneringsprogram voltooi en is gereeld opgemerk waar hy naellope gedoen het.
Hy het gister weer hier voor gehardloop toe die span sy sessie met ’n paar naellope afgesluit het.
Die groot vraagteken wat eerder oor Botha hang, is sy vermoë om sy robuuste spel binne perke te hou, maar die veteraan was sekerlik al genoeg kere om die blok om oor dié bruggie te kom.
Die Bulle-afrigter, Frans Ludeke, kon beswaarlik sy glimlag wegsteek, nie net oor Botha nie, maar ook oor die sege.
“Ja, dit is fantasties om hom terug te hê. Hy is ’n spesiale speler en sy teenwoordigheid lig die hele span. Almal is gretig om hom weer in aksie te sien,” het Ludeke erken.
“Ons het ook daardie sege broodnodig gehad, want skielik is ons terug tussen die voorlopers en weet ons lot is in ons eie hande.”
Saam met Botha is dit ook weer Babertonse madeliefie-tyd vir Gary Botha en Deon Stegmann, ná onderskeidelik ’n knie- en dyspierbesering.
Boonop sal Francois Hougaard, Chiliboy Ralepelle en Flip van der Merwe in ’n Ligblou- en nié Bok-trui nie, op Vodacompark uitdraf.
Werner Kruger, wat kort voor die Haaie-wedstryd weens ’n seer enkel onttrek is, het gister sy fiksheidstoets geslaag, maar Jaco Engels, Fudge Mabeta, Stefan Watermeyer, Juandré Kruger en Wilhelm Steenkamp het weens ligte skete nié geoefen nie.
“Hulle sal reg wees. Dit is in dié stadium net Fudge (skouer) en Dewald Potgieter (knie) wat nie oorweeg kan word nie.”
Ludeke het bevestig dat Danie Rossouw, Victor Matfield, Pierre Spies, Morné Steyn en Wynand Olivier almal die volgende maand se wedstryde gaan misloop, aangesien die gekontrakteerde Springbokke deur die Bok-bestuur aangesê is om eers ’n kondisioneringsprogram te deurloop.
Hulle sal eers in die laaste week voor die halfeindstryd gekies kan word.
Gurthrö Steenkamp sal ook in dié tyd rus, al het hy nie ’n nasionale kontrak nie.
“Ons het met die Bok-bestuur ooreengekom dat hy rus.
Hy het die hele Super14- en Drienasies-reeks gespeel en dit is in nasionale belang dat hy ruskans kry.
Ons het dus geen probleem gehad om in te stem dat hy ook op die program gaan nie,” het Ludeke gesê.
Volgens Olivier, wat die afgelope twee weke vir die Bulle gespeel het nadat hy oorbodig vir die Bok-behoeftes was, kom die ruskans op die regte tyd.
“Ek kan doen daarmee, maar dit bly lekker om vir die Bulle te speel,” het hy gesê.
Bly op hoogte van al die jongste sportnuus deur Nuus24Sport op Twitter te volg
– Sport24