Bakkies bly langer in Frankryk

2012-11-28 12:55

Johannesburg – Die voormalige Blou Bul- en Springbok-slot Bakkies Botha het sy kontrak met die Franse klubspan Toulon tot 2015 hernu.

Botha het na afloop van verlede jaar se Wêreldbeker in Nieu-Seeland by die Franse klub aangesluit.

Alhoewel hy aan die begin van die seisoen met 'n hakseningbesering gesukkel het, het die strydros eindelik een van Toulon se sleutelspelers geword.

Botha het 'n groot rol gespeel om die span op die boonste posisie van die Top14-punteleer te kry.

Hy het aanvanklik tot 2013 geteken, maar sal nou tot die einde van 2015 in Frankryk bly.

Toulon sal volgende seisoen drie Suid-Afrikaans gebore spelers in hul groep hê; Botha, die kaptein Joe van Niekerk en die losvoorspeler Danie Rossouw, wat vanaf die Japanse klub Suntory Sungoliath by die span sal aansluit.

Vir die jongste sportnuus volg Nuus24Sport op Twitter.

– Keo