Andrew Mehrtens brei Franse klub

2012-11-08 16:24

Beziers – Die voormalige All Black-losskakel Andrew Mehrtens is Donderdag as die nuwe afrigter van die Franse klubspan Beziers onthul.

Mehrtens sal Claude Saurel, wat die prys betaal vir 'n swak seisoen waar Beziers tot die 14de plek op die tweede liga se punteleer geval het, as hoofbreier vervang.

Die 39-jarige Mehrtens, wat in 70 toetse vir die All Blacks uitgedraf het, het by dié Franse klub as speler begin en is sedert 2010 deel van die afrigtingspan.

Hy was die hulpbreier vir Philippe Benetton voordat laasgenoemde in Oktober afgedank is en deur Saurel vervang is.

Beziers het Franse klubrugby in die 1970's en 80's domineer toe die span 10 titels in 14 jaar vanaf 1971 gewen het, maar die span speel sedert 2006 nie meer in die top-liga nie.

Vir die jongste sportnuus volg Nuus24Sport op Twitter.



       

- Sapa - AFP