André Pretorius straks teen Griekwas
2010-08-27 07:39
Johannesburg - Gaan weerlig vanaand in Durban tussen die Haaie en Griekwas twee keer op dieselfde plek slaan?
Die besoekers uit die Noord-Kaap is die enigste span wat die Haaie in die eerste ronde van die Curriebeker-rugbyreeks kon klop, maar om dit te herhaal, sal dit vanaand gedoen moet word in omstandighede waar die Poubloues gewoonlik sukkel.
Groot nederlae is aan die orde van die dag wanneer hulle in Durban besoek aflê.
Maar nadat hulle verlede week so naby daaraan gekom het om die Blou Bulle op Loftus Versfeld af te slag, sal Griekwas hope selfvertroue hê.
Die besoekers sal ook vind die Haaie is ’n ander gedierte as wat die geval in Kimberley was.
Die groot nuus uit ’n Haaie-oogpunt is die insluiting van André Pretorius op die plaasvervangersbank.
Nadat hy feitlik die afgelope twee jaar uit aksie was met beserings, gee hy vanaand sy eerste tree terug.
Daar is drie veranderings aan die beginspan, met Monty Dumond wat die beseerde Louis Ludik vervang as heelagter, Keegan Daniel wat in Ryan Kankowski se plek agtsteman speel en Jacques Botes wat as flank in Daniel se plek inskuif.
Die tuisspan sal sy ystermanne soos Bismarck du Plessis, Beast Mtawarira en Willem Alberts gebruik om Griekwas voorlangs tot oorgawe te dwing, voordat manne soos Lwazi Mvovo en Odwa Ndungane op vleuel losgelaat gaan word.
Of die hartverskeurende wyse waarop hulle in die doodsnikke met ’n mislukte doelskop teen die Bulle verloor het, enige letsels op Griekwas gelaat het, sal gesien moet word.
Die twee voorste driedrukkers in die reeks is in die Haaitenk in aksie, met die besoekers se Bjorn Basson (9) en Mvovo (7) wat nie ’n navigasie-toestel nodig het om die pad doellyn toe aan te dui nie.
Die spanne is:
Haaie: Monty Dumond, Odwa Ndungane, Stefan Terblanche (k), Andries Strauss, Lwazi Mvovo, Patrick Lambie, Charl McLeod, Keegan Daniel, Willem Alberts, Jacques Botes, Alistair Hargreaves, Steven Sykes, Wiehahn Herbst, Bismarck du Plessis, Beast Mtawarira.
PLAASVERVANGERS: Craig Burden, Eugene van Staden, Anton Bresler, Michael Rhodes, Rory Kockott, André Pretorius, Riaan Swanepoel.
Griekwas: Riaan Viljoen, Richard Lawson, Wilmaure Louw, Barry Geel, Bjorn Basson, Naas Olivier (k), Sarel Pretorius, Burger Schoeman, Rohan Kitshoff, Davon Raubenheimer, Cecil-John Kemp, Michael Passaportis, Jean Botha, Ryno Barnes, Steph Roberts.
PLAASVERVANGERS: Simon Westraad, Jacobie Adriaanse, Johan van Deventer, Gerhard Human, Marnus Hugo, Rocco Jansen, Rudi Vogt.
Afskop: 19:00.
Bly op hoogte van al die jongste sportnuus deur Nuus24Sport op Twitter te volg.
- Sport24