Allister gepeper met vrae oor Rassie, Nienaber
2012-01-12 08:51
Hermanus – Die Stormers se rugby-afrigter, Allister Coetzee, het gister hier skaars die Kaapse media gegroet voordat ongemaklike vrae op ’n pragtige sonskyndag op hom begin reën het.
Watter impak dink hy sal Rassie Erasmus se bedanking as direkteur van rugby by die Westelike Provinsie op die Stormers hê?
Dink hy dat hy Jacques Nienaber end-uit in vanjaar se Super-reeks in sy bestuurspan gaan hê, gegewe dié verdedigingsafrigter se noue koppeling aan Erasmus?
“Kom ons kry dié kwessie uit die pad,” het Coetzee gesê voordat hy herhaaldelik in ’n hoek gedruk is.
“Hierdie is ’n mediakonferensie oor die pad vorentoe vir die Stormers. Ek dink die Rassie-kwessie is reeds met ’n mediavrystelling afgehandel.
Ons het ’n gevestigde groep spelers en ’n bestuurspan.
“Rassie is my vriend en jy sal altyd iemand van sy kaliber mis.
Ons moet ons egter nou by ons taak bepaal en alles het reeds goed met die oefenkamp afgeskop. Die lewe gaan aan.”
Coetzee sal wel meer hooi op sy vurk hê. “Ja, ek sal vorentoe vir die kontraktering verantwoordelik wees.
“Die ouens hier is egter almal reeds gekontrakteer.”
Coetzee het in antwoord op die vraag oor Nienaber gesê: “Die bestuurspan is gevestig. Jacques is deel van die bestuurspan, wat onveranderd bly.”
Nienaber is danksy sy werk by die Stormers die laaste paar seisoene nou ’n uiters gesogte verdedigingsafrigter.
Hy en Erasmus was albei konsultante by verlede jaar se Wêreldbeker-toernooi.
Die Springbokke het in hul vier groepwedstryde in Nieu-Seeland slegs 24 punte afgestaan – minder as enige ander span.
Coetzee se eie ambisies het gister ook ter sprake gekom. Hy is nie die gunsteling om op 27 Januarie die nuwe Bok-afrigter te word nie en sy onmiddellike fokus lê ook nie daar nie.
“Ek spits my uitsluitlik op die Stormers se oefenkamp toe. Daar is nog ses weke voor ons eerste wedstryd in die Super-reeks en dit sal nie die gewenste ding wees om jou aandag by ander sake te bepaal nie. Ons belangrikste datum is 25 Februarie.”
Die Stormers begin op dié dag hul Super-veldtog – op Nuweland teen die Hurricanes.
Dit is nog onduidelik of die WP ’n opvolger vir Erasmus sal aanwys.
Rob Wagner, besturende direkteur van WP-Rugby Edms. Bpk., het gesê dit sal mettertyd op direksievlak bespreek word.
– Vir die jongste sportnuus volg Nuus24Sport op Twitter.
– Sport24